ჩრდილის ამტანი მცენარეები - თუ თქვენს ფანჯრებში მზის შუქი არ შემოდის

აგლაონემა

აგლაონემა მალაიზიური წარმოშობის ბუჩქის მსგავსი, მოკლეღეროიანი მცენარეა. ის 1880 წელს აღმოაჩინეს და მის შემდეგ პოპულარულ მცენარედ ითვლება.

აგლაონემას მოგრძო, ზოლიანი ფოთლები აქვს. ის ნელა იზრდება, ამიტომ ქოთნის ხშირად გამოცვლას არ საჭიროებს. აგლაონემას არ მოსწონს ქარი და კვამლი, ამიტომ არასასურველია მისი აივანზე დადება, განსაკუთრებით - თუ აივანზე ეწევით.

მცენარე იშვიათად ყვავილობს. ზაფხულობით ამოაქვს ტარო ყვავილედი წვრილი ყვავილებით. ნაყოფი წითელი ფერის კენკრაა, რომელიც 6-7 თვის შემდეგ მწიფდება. მისი წვენი ლორწოვან გარსს აღიზიანებს, ამიტომ მცენარესთან კონტაქტის დროს ხელთათმანები უნდა გამოიყენოთ.

რაც შეეხება მოვლას, ხშირად შეასხურეთ წყალი, დაუყარეთ სპეციალური სასუქი, მზეზე არ დადგათ, მაგრამ სითბოში გყავდეთ.

ასპლენიუმი

ასპლენიუმი გვიმრის ერთ-ერთი სახეობაა, მიუხედავად იმისა, რომ სტანდარტული გვიმრისგან განსხვავებით, დანაკვთული ფოთლები არ აქვს.

პროპორციული ფორმისა და სალათისფერი შეფერილობის წყალობით ასპლენიუმი ნოტიო ტროპიკული ტყის ეფექტს ქმნის. უჩვეულო ფოთლებით ასპლენიუმს ადვილად გამოარჩევთ სხვა სახეობებისგან. ფოთლების მაქსიმალური სიგრძე შეიძლება 60 სმ. იყოს.

მცნარე ხშირად დანამეთ. აქტიური ზრდის პერიოდში უხვად მორწყეთ, ზამთარში კი მხოლოდ მიწა დაუტენიანეთ.

ჰელქსინა

ეს მცენარე დაკიდულ ქოთნებში თვალწარმტაცად გამოიყურება - კაშკაშა, პატარა ფოთლები ერთ დიდ გვირგვინად იკვრება და ჰაეროვანი მწვანე ღრუბელს ემსგავსება.

გახსოვდეთ, არანაირი მზის პირდაპირი სხივები! ამ მცენარეს მხოლოდ დანამვა და ხშირი მორწყვა ესაჭიროება.

ჰელქსინია მარტივად მრავლდება. ამისათვის საჭიროა ფრთხილად გადაჭრათ ღერო მიწასთან და ახალ ქოთანში გადარგოთ.

სანსევიერია

სანსევიერია გამძლე და მრავალწლიანი მცენარეა, რომელსაც მკვრივი და წვეტიანი მუქი მწვანე ფოთლები აქვს.

ეს მცენარე განსაკუთრებულ ზრუნვას არ მოითხოვს - შეგიძლიათ რამდენიმე წლის განმავლობაში არ გადანერგოთ და დიდი ხნის განმავლობაში არ მორწყათ, რადგან ტენიანობა არ უყვარს.

სანსევერია შესანიშნავად ეგუება როგორც მზეს, ასევე ჩრდილს, კარგად იტანს სიცხეს და ქარს.

სცინდაპსუსი

ეს ძალიან პოპულარული ოთახის მცენარეა, რასაც ბევრი მიზეზი აქვს. მას ცოტა შუქიც ჰყოფნის და ხშირად მორწყვაც არ სჭირდება.

სცინდაპსუსი ძალიან აქტიურად წმენდს ჰაერს და ნახშირბადის მონოქსიდს გარდაქმნის ჟანგბადად, რაც ძილისთვის ძალიან სასარგებლოა.

სცინდაპსუსს არ უყვარს ქარი, სიმშრალე, სითბო, იშვიათად უნდა მორწყვა.

დრაცენა

დრაცენა ლამაზი მცენარეა, რომელიც პატარა პალმის ხეს ჰგავს. მისი ვიწრო და გრძელი ფოთლები 70 სმ-ს აღწევს. დრაცენა პრეტენზიული მცენარე არაა, თუმცა, მის მოვლასაც აქვს განსაკუთრებული წესები. ეს ძირითადად, მორწყვას უკავშირდება.

თბილი აფრიკიდან ჩვენთან მოსული მცენარე ვერ იტანს ცივ წყალს. წყალი ოთახის ტემპერატურის უნდა იყოს. დრაცენას მორწყვა არ შეიძლება ონკანის წყლით, რომელიც ქლორს შეიცავს. მისთვის რამდენიმე საათით დაყენებული წყალი გამოიყენეთ.

სხვათა შორის, არ ღირს დრაცენას მორწყვა გადადუღებული წყლითაც.