ეპილაცია კლეოპატრას და თამარ მეფის დროს

ყველაფერი დაიწყო ეგვიპტიდან

დადასტურებული ისტორიული წყაროების მიხედვით, პირველი ქალი, ვინც დანარჩენი ქალები ამ ორომტრიალში გაგვხვია, კლეოპატრაა. ცნობილია, რომ ეგვიპტელი დედოფალი ფეხებზე თმების მოსაცილებლად ცვილის ნიღბებს იყენებდა. და არამხოლოდ ის: კლეოპატრა თავის მონა გოგონებსაც აიძულებდა უთმო და გლუვი კანი ჰქონოდათ ფეხებზე.

ეპილაციის გზებიც რომში მიდიოდა

ეპილაცია ძველ რომშიც პოპულარული გახლდათ. ქალაქურ აბანოებში ცალკეული ოთახები არსებობდა, სადაც ეს პროცედურა ტარდებოდა. თმის მოცილების მეთოდი აქ ნამდვილად ბარბაროსული იყო: თმას უხეშ ძაფებზე ახვევდნენ და ასე აძრობდნენ.

და ამერიკაშიც

ძველი ინდიელები სხეულის მთელი ზედაპირიდან იცლიდნენ თმას, კაცებიც და ქალებიც. რატომ? მოსახატად გლუვი კანი გაცილებით მარტივი იყო.

საბერძნეთშიც

ელადაში ქალები ბრინჯაოს პინცეტებს და ბეონიის ფესვის ნაყენს იყენებდნენ. თუმცაღა ძველ საბერძნეთში მიიჩნეოდა, რომ ტორსის შიშვლად გამოჩენა ხალხში უწესობა იყო როგორც ქალებში, ასევე - მამაკაცებში.

და ინგლისშიც, სადაც უფრო შემოქმედებითად მიუდგნენ პროცესს

შუა საუკუნეების დედოფლები უფრო შორს მიდიოდნენ და თმების მოცილება მხოლოდ ფეხიდან არ აკმაყოფილებდათ. მაგალითად, ინგლისის დედოფალი ელიზაბეთი თმას შუბლიდან თითქმის კეფამდე იცლიდა. და რადგანაც მაშინდელ ევროპაში სწორედ დედოფლები იყვნენ მაღალი მოდის ფუძემდებლები, ე.წ. „ტრენდსეტერები“, მაშინდელი მაღალი საზოგადოების ქალებიც მათ ბაძავდნენ. აქ მაღალი შუბლი ახალგაზრდობისა და არისტოკრატობის სიმბოლოდ მიიჩნეოდა. ქალებიც უძლებდნენ ამ ეპილაციის მტკივნეულ პროცესს, რომელიც საათობით გრძელდებოდა. შემდეგ კი თმაგაცლილ შუბლზე სპეციალურ ნიღაბს ისვამდნენ, რომელიც ღამურების, ბაყაყების სისხლისა და ნაცრისგან მზადდებოდა. ეს ნიღაბი თმის ხელმეორედ ამოსვლას აფერხებდა.

კანის მოვლა მოდური იყო რუსეთის საიმპერატორო კარზეც

ეკატერინე დიდი მთელ მაშინდელ მსოფლიოში ეძებდა კლეოპატრას კრემების რეცეპტებს. იგი შვარცვალფის ბალახის ექსტრაქტზე და ბადენ-ბადენის თერმული წყლების საფუძველზე დამზადებულ კრემს ხმარობდა.

დაბოლოს - სილამაზის პროცედურებს საქართველოში ევროპაზე და რუსეთზე ადრე იცნობდნენ

მსოფლიო ტრენდს ქართველი ქალები არასდროს ჩამორჩებოდნენ. ამბობენ, თამარ მეფე წარბებსაც ძაფის მეშვეობით იქნიდა. ძაფს მაგრად ჭიმავდნენ, ისე, რომ ზამბარასავით ყოფილიყო დაგრეხილი და არასასურველ თმაზე გადაატარებდნენ. სხვათა შორის, ეს მეთოდი ჯერ კიდევ გამოიყენება წარბების გასაკეთებლად რამდენიმე თბილისურ სალონში.