გინებას ანესთეზიის ეფექტი აქვს - ოქსფორდის ფსიქოლოგების ახალი კვლევა

ზოგჯერ ხდება, რომ ჩაქუჩს, ლურსმნის ნაცვლად, თითში ვირტყამთ ან მდუღარე წყალს, ჭიქის ნაცვლად, ფეხზე ვისხამთ და ტკივილს უხამსი, სალანძღავი სიტყვებით გამოვხატავთ.
ეს ფენომენი საერთაშორისოა და პლანეტის ყველა კუთხეში მუშაობს. საყოფაცხოვრებო ტრამვის შემთხვევაში გინება, ერთი შეხედვით, ირაციონალურია და, უბრალოდ, ამ გზით ემოციებს გამოვხატავთ, თუმცა, მეცნიერებმა გაარკვიეს, რომ ყველაფერი არც ისე მარტივადაა და გინება ნამდვილად გვეხმარება ტკივილის დაძლევაში.

ოქსფორდის უნივერსიტეტის ექსპერიმენტის დროს მოხალისეებს ხელი ყინულიან წყალში ედოთ და საგინებელ და ორ სხვა, აბსტრაქტულ სიტყვას ყვიროდნენ.

როგორც აღმოჩნდა, ექსპერიმენტის მონაწილეები გინების დროს ნაკლებად მწვავე ტკივილს განიცდიდნენ, ვიდრე აბსტრაქტული სიტყვების წარმოთქმის დროს.
შედეგად, ფსიქოლოგები მივიდნენ დასკვნამდე, რომ ადამიანები ტკივილის დროს ბუნებრივი ანესთეზიის მიზნით იგინებიან. ექსპერტებმა გადაწყვიტეს, რომ გინების დროს ენერგიას გამოვყოფთ და ტკივილს ვამსუბუქებთ. ამავე დროს, სიტყვები აუცილებლად უნდა იყოს უხამსი, წინააღმდეგ შემთხვევაში ტკივილგამაყუჩებელი ეფექტი არ აქვს.

ეს უცენზურო გამოთქმების ერთადერთი სარგებელი არ არის.
შარშან ამერიკელმა ექსპერტებმა შრომის ნაყოფიერებაზე გინების გავლენა შეისწავლეს. მათ დაადგინეს, რომ თანამშრომელი, რომელიც ხშირად იგინება, უკეთ უმკლავდება დაკისრებული დავალებების შესრულებას.