რატომ ყივიან მამლები?

როგორც ცნობილია, მამლები მხოლოდ დილაობით არ ყივიან.

ბუნებაში ქათმების თითოეულ ჯგუფს თავისი ტერიტორია აქვს, სადაც ისინი საკვებს ეძებენ და მრავლდებიან. მამლები თავიანთ სამფლობელოს ძალიან მკაცრად იცავენ სხვა მამლებისგან, მაგრამ დაუნდობელი ბრძოლები, დაზიანებები და მით უმეტეს, სიკვდილი, სახეობისთვის ძალიან საზიანოა. სწორედ ამიტომ, ბუნებამ ისე მოაწყო, რომ ეს საომრად განწყობილი ფრინველები ტერიტორიას სისხლის ღვრის გარეშე იცავდნენ და მოწინააღმდეგეების დაშინებას ომახიანი ყივილით ცდილობენ.

მამლის ყივილი იმის ნიშანია, რომ ის ტერიტორიის მფლობელი და „დედლების ჰარამხანის“ ბატონ-პატრონია. ეს აკუსტიკური სიგნალი ფრინველთა ურთიერთობისთვის უკიდურესად მნიშვნელოვანია, განსაკუთრებით, გარეული სახეობებისთვის.

თუმცა, შინაური მამლებიც დღემდე განაგრძობენ თავიანთი ტერიტორიის „მონიშვნას“ და მთელ სოფელს ამცნობენ, რომ ეზო და საქათმე მათია.

მამლის ყივილი სხვა მამლების გამოწვევას ჰგავს და ისინიც საპასუხო ყივილით პასუხობენ. თუმცა, თუ ეზოში მთავარ მამალს დაქვემდებარებული ყვინჩილა ყივილს გაბედავს, მთავარი მამალი მაშინვე შეუტევს.

ესეც საინტერესოა:

რატომ შექმნეს ისრაელში „შიშველი“ ქათმის ჯიში?