შაქარი თუ ასპირინი? - როგორ გავუხანგრძლივოთ ნაძვის ხეს სიცოცხლე

ყველაზე იოლი და ხელმისაწვდომი საშუალებაა 1 ლიტრ წყალში 1 ჩაის კოვზი შაქრის დამატება და ამ ხსნარით ნაძვის ხის მორწყვა. დეზინფექციის მიზნით შეგიძლიათ 3-5 ლიტრ წყალში 1 ასპირინი ან გააქტიურებული ნახშირი გახსნათ.

თუ თქვენს ბინაში მშრალი და ცხელი ჰაერია, მორწყვა წიწვებს სწრაფი გამოშრობისგან ვერ დაიცავს. ამ შემთხვევაში, მხოლოდ რეგულარული შესხურება დაგეხმარებათ. კვირაში 2-3-ჯერ შეასხურეთ ხეს ცივი წყალი შესასხურებელი ბოთლიდან. ნოტიო გარემოს შესაქმნელად, ხესთან ახლოს წყლით სავსე, ფართო კონტეინერები მოათავსეთ ან რადიატორზე სველი პირსახოცი დადეთ.

ჩვეულებრივის ნაცვლად, LED ნათურების გამოყენება ასევე ხელს შეუწყობს ტენიანობის შენარჩუნებას, თუმცა ისინი ღამით ჩართული არ უნდა დაგრჩეთ.

სასურველია, თბილ ოთახში შეტანამდე ნაძვის ხე აკლიმატიზაციისთვის, რამდენიმე დღით გრილ ადგილას, მაგალითად, აივანზე დატოვოთ.

პირველი 24 საათის განმავლობაში ხის სადგამის წყლით შევსება სითხის შეწოვის პროცესის თანდათანობით დაწყებას დაეხმარება.

მოსარწყავად თბილი (დაახლოებით 50°C) წყალი გამოიყენეთ. ეს ხელს შეუწყობს გამაგრებული ფისის დარბილებას და წყლის უკეთესი შეწოვისთვის ხის ღეროში სადინარების გახსნას.