საზაფხულო ტოლმა განსხვავებული რეცეპტით

3 ულუფა უხორცო ტოლმისთვის საჭირო პროდუქტი:

• წითელი ბულგარული წიწაკა - 300 გრ;
• მწვანე ბულგარული წიწაკა - 300 გრ;
• პომიდორი - 500 გრ;
• სტაფილო - 100 გრ;
• მწვანილები: ქინძი, ოხრახუში, ტარხუნა, კამა - 50 გრ;
• ნიორი - 2 კბილი;
• მოხარშული ბრინჯი - 400 გრ;
• ზეთი ან კარაქი - 100 გრ;
• მარილი, პილპილი - გემოვნებით;

მომზადების წესი:

კარგად გარეცხილ ბულგარულ წიწაკასა და პომიდორს მოაჭერით ყუნწი, გამოაცალეთ შიგთავსი და დაალაგეთ თეფშზე.

წვრილად დაჭრილი ხახვი მოთუშეთ ტაფაზე. დაამატეთ გახეხილი სტაფილო და ბულგარული წიწაკა. ხშირად ურიეთ და როგორც კი შეამჩნევთ, რომ სტაფილო და ბულგარული წიწაკაც მოითუშა, დაამატეთ კუბიკებად დაჭრილი კანგაცლილი პომიდორი, 2 კბილი დაჭყლეტილი ნიორი, წიწაკა, მარილი და ბოლოს წვრილად დაჭრილი მწვანილები.

როგორც კი ბოსტნეული მოითუშება, გამორთეთ გაზქურა და დაამატეთ მოხარშული ბრინჯი. კარგად გადაურიეთ და ტოლმის შიგთავსი მზადაა.

მიღებული მასით დატენეთ უკვე გამზადებული და გასუფთავებული წითელი და მწვანე ბულგარული წიწაკა, ასევე, პომიდორიც. ჩააწყვეთ ქვაბში ისე, რომ „ღია პირი“ ზემოთ იყურებოდეს.

დაამატეთ ცივი წყალი - ტოლმა ნახევრად უნდა დაიფაროს და დაადეთ ზედ განიერი თეფში - ტოლმის დაფიქსირებისთვის.
დუღილის დროს დაუმატეთ ოდნავ მარილი.

ხარშეთ, დაახლოებით, 10-15 წუთი და როგორც კი მიხვდებით, რომ ბულგარული წიწაკა მოხარშულია, გაზქურა გამორთეთ.

შენიშვნა:

საზაფხულო ტოლმა შეგიძლიათ, ტომატიან წყალშიც მოხარშოთ;

წითელი და მწვანე ბულგარული წიწაკის მოთუშვისას შეგიძლიათ, მათზე მოჭრილი ზედმეტი ნარჩენები წვრილად დაჭრათ და გამოიყენოთ.

გემრიელად მიირთვით!