ებრაელმა მეცნიერებმა მზის სხივების უჩვეულო ეფექტი გამოავლინეს

დიდი ხნის წინ დაადგინეს, რომ მზის სპექტრის ულტრაიისფერი ნაწილი მამაკაცებში ტესტოსტერონის დონეს ზრდის, თუმცა, მისი გავლენა ჰორმონალურ რეგულირებაზე გამოუკვლეველი რჩებოდა.

თელ-ავივის უნივერსიტეტის მკვლევარებმა, თავდაპირველად, ულტრაიისფერი გამოსხივების გავლენა თაგვებზე შეისწავლეს. მღრღნელები ულტრაიისფერი B-ით დაასხივეს და აღმოაჩინეს, რომ დედალ თაგვებში ჰორმონალური დონე მნიშვნელოვნად გაიზარდა, რამაც საკვერცხეების ზრდა და შეწყვილების დროის გახანგრძლივება გამოიწვია. გარდა ამისა, დასხივებულ დედალ და მამალ თაგვებში შეწყვილების სურვილმა და მზადყოფნამ მკვეთრად იმატა.

მესამე ექსპერიმენტში, რომელიც უკვე ადამიანებზე ჩატარდა, 32 მოხალისე მონაწილეობდა. კვლევამ დაადასტურა, რომ ულტრაიისფერი დასხივების შემდეგ, როგორც მამაკაცებში, ისე ქალებში საპირისპირო სქესის მიმართ ლტოლვა გაიზარდა. აღსანიშნავია, რომ მამაკაცებში სქესობრივი ლტოლვის გარდა, აგრესიის მატებაც გამოვლინდა.

მომდევნო ექსპერიმენტის მონაწილეებს სთხოვეს, მზის სხივებს ორი დღის განმავლობაში მორიდებოდნენ, შემდეგ კი 25 წუთის განმავლობაში მზის აბაზანა მიეღოთ. ამ ექსპერიმენტის შემდეგ სისხლის ანალიზმა ჰორმონების, კერძოდ კი ტესტოსტერონის ზრდა გამოავლინა.

კვლევამ დაადასტურა, რომ მზის ულტრაიისფერი შუქი და სექსუალური ლტოლვა ერთმანეთთან კავშირშია და ეს ფაქტორი შეიძლება სტეროიდული სქესობრივი ჰორმონების სამკურნალოდ გამოიყენონ.