რამდენი ვარსკვლავია ცაზე?

თანამედროვე ტელესკოპებისა და თანამგზავრების დახმარებით, სულ უფრო მეტი და უფრო შორი გალაქტიკებისა და ვარსკვლავთა ურიცხვი რაოდენობის დანახვა შეგვიძლია.

ამჟამად ცა 88 თანავარსკვლავედადაა დაყოფილი და ყოველი ვარსკვლავი ერთ რომელიმე თანავარსკვლავედს ეკუთვნის, თუმცა მათი ზუსტი რაოდენობის დადგენა სპეციალისტებსაც უჭირთ, რადგან არათანაბრად არიან გადანაწილებული. ისინი უზარმაზარ ჯგუფებს წარმოადგენენ, რომლებსაც გალაქტიკებს ვუწოდებთ.

მაგალითად, მხოლოდ „ირმის ნახტომში“, სადაც ჩვენი მზე მდებარეობს, 100 მილიარდამდე ვარსკვლავს ითვლიან და ეს მხოლოდ ერთი გალაქტიკის მონაცემებია, სამყაროში კი უთვალავი გალაქტიკაა!

ასტრონომებს ძალიან დიდხანს ეგონათ, რომ სამყაროში, დაახლოებით, 50 მლრდ გალაქტიკაა, თუმცა მხოლოდ HUBBLE-ს ორბიტული ტელესკოპის ამუშავებამ ეს ციფრი 2,5-ჯერ გაზარდა, თანაც HUBBLE-ც ყველაფერს ვერ ხედავს!
ვარსკვლავების ფორმირების დროს წარმოქმნილი მტვრისა და აირების ღრუბელი ხილვადობას ხელს უშლის. ღრუბელში შეღწევა მხოლოდ HERSCHEL-ის ინფრაწითელი ზონდის საშუალებით გახდება შესაძლებელი, რომელზეც მუშაობა მალე დასრულდება.

გალაქტიკაში ვარსკვლავების დათვლა არავის და არასდროს უცდია. როგორც წესი, იზომება რომელიღაც კონკრეტული მახასიათებელი, მაგალითად, გალაქტიკის ნათება, ხდება მისი გაყოფა იმავე მანძილზე მყოფი ვარსკვლავების საერთო ნათებაზე და ამგვარად, ვარსკვლავების რაოდენობის დადგენა.

როცა HERSCHEL ინფრაწითელ დიაპაზონში მყოფი ვარსკვლავების ნათებას გაზომავს, დაახლოებით, ამ პრინციპით დაითვლის გალაქტიკებს. ასე რომ, საჭიროა მხოლოდ მოცდა.

დღევანდელი მონაცემებით კი, შეგვიძლია ვივარაუდოთ, რომ სამყაროში 1 000 000 000 000 000 000 000 000, ანუ ტრილიონ ტრილიონი ვარსკვლავია.