რატომ აქვს ზოგ აქლემს ორი კუზი, ზოგს კი მხოლოდ ერთი?

კუზების რაოდენობის გარდა, ისინი ერთმანეთისგან სხეულის პროპორციებითა და ბეწვის სიგრძითაც განსხვავდება.

აქლემის გავრცელების არეალი

აზიური წარმოშობის ორკუზიანი აქლემი ცივი უდაბნოს ბინადარია, გვხვდება გობის უდაბნოსა და ტაკლა-მაკანში, ხოლო ერთკუზიანი აქლემი არაბეთის ნახევარკუნძულიდანაა და საჰარაშიც გვხვდება.

ერთკუზიანი აქლემი

ემბრიონობის სტადიაში ორივე სახეობის აქლემს ორი კუზი აქვს, მაგრამ დრომედარების შემთხვევაში, კუზები ერთმანეთს უერთდება და ერთკუზიანი აქლემი იბადება.

ეს იმაზე მეტყველებს, რომ ორმაგი კუზი შედარებით ძველი მახასიათებელია, თუმცა, გაუგებარია, რა სარგებელი მოუტანა კუზების გაერთიანებამ დრომედარს.

ორკუზიანი აქლემი

სხვათა შორის, ორკუზიან აქლემს - ბაქტრიანს ერთ ჯერზე 50 ლიტრი წყლის დალევა შეუძლია, მათ შორის - მარილიანის. ჭამს უდაბნოს პრაქტიკულად ყველანაირ მცენარეულობას. მამრების სქესობრივი აღგზნების პერიოდი ზამთარშია და ამ დროს მათ შორის ზოგჯერ სასტიკი ორთაბრძოლები იმართება.

აქლემის კუზში ან კუზებში გროვდება ცხიმი, რომლის დაშლის შედეგად წარმოიქმნება ენერგია და გამოიყოფა წყალი, რომელიც აქლემისათვის სასიცოცხლოდ მნიშვნელოვანია, მაგალითად, 9.3 გრამი ცხიმის დაშლის შედეგად, აქლემი 1.13 გრამ წყალს იღებს.