შემთხვევა, რომელიც ფილმის სიუჟეტს ჰგავდა - ცოლ-ქმარი 68 წლიანი თანაცხოვრების შემდეგ ერთად გარდაიცვალა

ბრენდა სტადი (Brenda Studd) 2020 წლის 27 სექტემბერს, COVID-19– ის გართულებით გამოწვეული სეფსისისგან გარდაიცვალა.

ცოლის სიკვდილის ამბავი რომ გაიგო, პანკრეასის კიბოთი დაავადებულმა ტერენს სტადმა (Terrance Studd) საკვების მიღებაზე და ლაპარაკზე უარი განაცხადა და 72 საათის შემდეგ გარდაიცვალა.

წყვილის ქალიშვილის, ჯული მაკკლუნის თქმით, დედის სიკვდილის შემდეგ მამამ ბრძოლა შეწყვიტა და სიკვდილს დანებდა. „მათ ერთად 68 ბედნიერი წელი გაატარეს. მცირე რამ ახარებდათ: ცეკვა, რესტორანში სიარული, ოპერა და ლატარიის თამაში”, - დასძინა მან.

ბრენდამ და ტერენსმა ერთმანეთი 1953 წელს გაიცნეს, როდესაც 15 წლის მოზარდები იყვნენ. ერთი წლის შემდეგ იქორწინეს და მას შემდეგ ერთმანეთის გარეშე ერთი დღეც არ გაუტარებიათ.

შვილიშვილის მონაყოლიდან ირკვევა, რომ ბრენდა ძალიან მიმზიდველი ქალი იყო და სილამაზის კონკურსებში ხშირად მონაწილეობდა, ტერენსი კი მანქანათმშენებლად მუშაობდა. 1979 წელს ექიმებმა ბრენდას გაფანტული სკლეროზის დიაგნოზი დაუსვეს, ტერენსი კი ზუსტად ისე, როგორც ცნობილ ფილმში, „უბის წიგნაკშია“ მთელ დღეებს მის მოვლაში ატარებდა.

ცოლ-ქმარი 5 ნოემბერს, ერთად დაკრძალეს. მათი ფერფლი ერთმანეთს შეურიეს და იმ ადგილზე გაფანტეს, სადაც ყველაზე მეტად უყვარდათ დასვენება. გარდაცვალების მომენტისთვის ცოლიც და ქმარიც 83 წლის იყვნენ.

მსგავსი შემთხვევა რამდენიმე თვის წინ, ინგლისშიც მოხდა. წყვილი, რომელიც 67 წლის განმავლობაში ერთად ცხოვრობდა, კორონავირუსის გართულებებით, ერთ დღეს გარდაიცვალა.

წყარო: www.mirror.co.uk