რატომ აქვთ ინდუსთა ღმერთებს ბევრი ხელი?

ინდუსებს, დაახლოებით, 33 მილიონი ღმერთი ჰყავთ. მათი უმრავლესობა მრავალთავიანი და მრავალხელიანია. აქედან, სამი უმთავრესი ღვთაებაა:

ბრაჰმა — თითოეული კოსმოსური ციკლის დასაწყისში სამყაროს შემოქმედი;
ვიშნუ — სამყაროს დამცველი;
შივა — სამყაროს დამანგრეველი.

მრავალხელიანობა, უპირველეს ყოვლისა, წარმოუდგენელ ძალას და ერთდროულად რამდენიმე ამოცანის შესრულების უნარს ნიშნავს, მაგრამ მას ფილოსოფიური მნიშვნელობაც აქვს.

მაგალითად, შივას შემთხვევაში, რომელიც ინდუისტური სამების გამანადგურებელ ღვთაებას წარმოადგენს, შემოქმედ ბრაჰმას და მფარველ ვიშნუს გვერდით, ერთი წყვილი ხელი სიმბოლურად გამოხატავს წონასწორობას სიცოცხლესა და სიკვდილს შორის, მეორე - ბრძოლას სიკეთესა და ბოროტებას შორის, მესამე - ობიექტურ და სუბიექტურ ჭეშმარიტებას, მეოთხე - სამყაროს დაბადებას და მის განადგურებას.

ღმერთებს ადამიანებისგან არა მხოლოდ ხელების რაოდენობა გამოარჩევს.

შივას შუბლზე მესამე თვალი ღვთაებრივ სიბრძნეზე, აწმყოს, წარსულისა და მომავლის დანახვის უნარზე მეტყველებს. შივას შეუძლია ერთდროულად დაინახოს რაც დედამიწაზე, ზეცაში და მიწის ქვეშ ხდება.

ღვთაების სამი თავი მისი ბუნების სხვადასხვა მხარეს განასახიერებს: ღვთაებრიობას, შეუპოვრობას და მარადიულ ნეტარებაში ყოფნის უნარს.

თუმცა სამი თავი ღვთაების „შესაძლებლობების“ მაქსიმუმი არაა. მიიჩნევა, რომ ღვთაება ნარაიანას ათასობით თავი აქვს.