ჩეხი ექიმი, რომელმაც თბილისში სამხედრო ჰოსპიტალი დააარსა და ქართულ კურორტოლოგიას ჩაუყარა საფუძველი

იან (ივანე) ანტონინის ძე პრიბილი 1782 წლის 14 სექტემბერს ქალაქ იიჩინ-ში (Jičín) დაიბადა. მისი დედა ანა შტერბოვასა გახლდათ, მამა - ანტონინ პრიბილი, ტანსაცმლის მკერავი იყო.

მან განათლება ჯერ პრაღაში მიიღო - 1799 – 1802 წლებში სწავლობდა Universitas Carolina Pragensis-ის ფილოსოფიურ ფაკულტეტზე, 1802 – 1804 წლებში სწავლა გააგრძელა იმავე უნივერსიტეტის სამკურნალო ფაკულტეტზე, შემდეგ კი განათლების მისაღებად ვენაში გადავიდა. იქვე დაიცვა სადოქტორო დისერტაცია.

იან პრიბილი კავკასიის სამედიცინო საზოგადოებისა და პეტერბურგის ექიმთა საზოგადოების საპატიო წევრი, შავი ჭირისა და ქოლერის წინააღმდეგ ბრძოლის კომისიის თავმჯდომარე.

იანი ვენიდან სამუშაოდ რუსეთში მიავლინეს, სადაც ჯერ სამხედრო ექიმად მსახურობდა, შემდეგ კი, პირველ პოლკთან ერთად, საქართველოში გადმოსვლა მოუწია. თბილისში 1808 წელს ჩამოვიდა და სიცოცხლის ბოლომდე აქ დარჩა.

მან საქართველოში 50 წელზე მეტი გაატარა და ამ ხნის განმავლობაში ჩვენი ქვეყნის განვითარებაში დიდი წვლილი შეიტანა. მისი სახელი „ქართული მედიცინის ისტორიის“ წიგნშიც არის შესული.

იან პრიბილი გავლენიან ქართველებთან დაახლოებული პირი იყო. პრიბილს ახლო ურთიერთობა ჰქონდა ალექსანდრე ჭავჭავაძის ოჯახთან, მკურნალობდა გრიბოედოვს.

ცოლად ქართველი თავადის ქალი, ექომების ოჯახის შვილი ეკატერინე ყარაშვილი შეირთო, რომელიც კათოლიკე იყო.

იან პრიბილი 85 წლის ასაკში გარდაიცვალა.