იაპონიის „ყველაზე ხანდაზმულ“ სოფელში მუშახელს ეძებენ

როგორც ირკვევა, ადგილობრივი 1 337 მცხოვრებიდან ორი მესამედი 65 წელს გადაცილებულია, ამიტომ ქალაქში სამუშაო ხელის მწვავე დეფიციტია — სოციალური მუშაკები სანთლით საძებნელია, ავტობუსის მძღოლები კი 70 წელს გადაცილებული პენსიონერები არიან. ჩინოვნიკები ნანმოკუში მუშაობის მსურველ ახალგაზრდებს ეძებენ და მიტოვებული სახლების უფასოდ გადაცემას ჰპირდებიან, თუმცა ჩამოსულთა რაოდენობა არ იზრდება.

„თუ არაფერი შეიცვლება, ხუთ წელიწადში თემს დასაქმებული ადამიანი არ ეყოლება“ — აღიარებს ქალაქის მერი საიძო ჰასეგავა.

საბოლოოდ, ნანმოკუელებმა გამოსავალი სხვა კონტინენტზე იპოვეს. ამაში გადამწყვეტი როლი იაპონური წარმოშობის პერუელმა, 35 წლის ავტოდილერმა მასაო აიზავამ ითამაშა. მან ნანმოკუს გასაჭირის შესახებ შეიტყო და იაპონურ მხარესა და პერუს ჩრდილოეთით მდებარე ქალაქ ბელენს შორის მოლაპარაკება დაგეგმა. ქალაქ ბელენში 80 000-მდე ადამიანი ცხოვრობს, რომელთა უმრავლესობა ახალგაზრდაა. ამასთან, პერუს ხელისუფლება იაპონიასთან პარტნიორობაზე დიდი ხანია, ოცნებობდა.

უკვე ამ შემოდგომაზე ახალგაზრდა პერუელების ჯგუფი ნანმოკუში 10-დღიან სტაჟირებაზე ჩავა, რათა იაპონური პროვინციის ყოფა-ცხოვრებასა და კულტურას გაეცნოს.

იაპონურ მხარეს იმედი აქვს, რომ სტუმრებს დარჩენის სურვილი გაუჩნდებათ. მათ იაპონური ენის კურსებისა და მომვლელ-ექთნის სპეციალობის დაფინანსებას ჰპირდებიან.

„მცირე ჯგუფიც რომ დასახლდეს, ქალაქის შენარჩუნებას შევძლებთ“, — ამბობს ჰასეგავა. იმის მიუხედავად, რომ ადგილობრივი დეპუტატების ნაწილი უსაფრთხოებაზე ნერვიულობს, სავიზო კანონმდებლობა კი დამატებით სირთულეებს ქმნის, მერი ოპტიმიზმს არ კარგავს: „ათი ახალგაზრდა პერუელი ქალაქისთვის მომავლის შანსია“ — აღნიშნავს ჰასეგავა.

ცნობისათვის — ნანმოკუ მთიან რეგიონში მდებარეობს და პოპულარულია ბუნების მოყვარულებში. მის მთავარ ღირსშესანიშნაობებს შორისაა სემისა და სენგატაკის ჩანჩქერები, კუროტაკისან ფუდო-ჯის ტაძარი და ჰოშიოს თერმული წყაროები.

***

ნანმოკუს მსგავსი პრობლემები: მოსახლეობის დაბერება, შობადობის დაბალი დონე და სამუშაო ხელის დეფიციტი მსოფლიოს უამრავ ქვეყანას აწუხებს. ამ მოვლენას დემოგრაფიაში „სუპერ-დაბერებულ საზოგადოებებს“ უწოდებენ (როდესაც მოსახლეობის 20%-ზე მეტი 65 წელს გადაცილებულია).

ამ მხრივ, იაპონია უდავო ლიდერია, თუმცა ეს პრობლემა ბევრ სხვა ქვეყანასაც უდგას:

იაპონია

ნანმოკუს გარდა, იაპონიაში ასობით ასეთი „მკვდარი ქალაქია“. მაგალითად, იუბარიზე (ჰოკაიდოს კუნძული) მცხოვრებთა ნახევარზე მეტი პენსიონერია. მსხვილ ქალაქებს შორის კი საპოროში, ნიიგატასა და კუმამოტოში 65 წელს გადაცილებულთა წილი 30-32%-ს აღწევს.

სამხრეთ კორეა

სამხრეთ კორეას მსოფლიოში შობადობის ყველაზე დაბალი მაჩვენებელი აქვს. ქალაქ პუსანში პენსიონერთა წილი რეკორდულად იზრდება, ხოლო სოფლის ტიპის დასახლებებში მოსწავლეთა სიმცირის გამო სკოლები იხურება.

იტალია

იტალია ევროპაში ყველაზე დაბერებული ქვეყანაა. ლიგურიის რეგიონში მდებარე ქალაქი გენუა ევროპის ყველაზე „ხანდაზმულ“ დიდ ქალაქად ითვლება (მოსახლეობის 28%-ზე მეტი პენსიონერია). იტალიის ბევრ რეგიონში (მაგ. სარდინიაში ან სიცილიაში) სახლებს 1 ევროდ ყიდიან, რომ ახალგაზრდები მიიზიდონ.

გერმანია

რურის რეგიონის და აღმოსავლეთ გერმანიის მცირე ქალაქებში ხანდაზმულთა წილი 22-25%-ს აჭარბებს.