ხორცი, რომელიც 15 წელი ინახება – ფრანგი ფერმერების ოჯახის ტექნოლოგია

fun time

16:56 პარ. 16 მაისი

დაკოპირებულია

საფრანგეთის ქალაქ სენ-მიელში მდებარე Polmard-ის ფერმა ჰიბერნაციის მეთოდის გამოყენებით მსოფლიოში ყველაზე განსაკუთრებულ ხორცს აწარმოებს. ამ მეთოდით დავარგებული ხორცი 15 წლის განმავლობაში ინახება ისე, რომ ხარისხს არ კარგავს.

ალექსანდრე პოლმარი მეექვსე თაობის ფერმერია.

მისი ოჯახი 1846 წლიდან მოყოლებული საქონლის ხორცს აწარმოებს. პოლმარების ბიზნესმა სახელი 1990-იან წლებში გაითქვა, როდესაც ალექსანდრეს ბაბუამ და მამამ ხორცის დამუშავების ინოვაციური მეთოდი შეიმუშავეს.

მსოფლიოში ყველაზე ექსკლუზიური ხორცის მისაღებად, პოლმარის ფერმა Blonde d’Aquitaine ჯიშის მსხვილრქიან პირუტყვს იყენებს. საქონელს თავისუფალ, ბუნებრივ გარემოში ცხოვრებას აჩვევენ, რათა სტრესი მინიმუმამდე შემცირდეს.

საქონლის დაკვლის შემდეგ ფერმის ლაბორატორიაში ხორცს განსაკუთრებული მეთოდით ამუშავებენ: მისკენ -43 გრადუსამდე გაცივებული ჰაერის ჭავლს 120 კმ/სთ სიჩქარით მიმართავენ. ეს ტექნოლოგია საშუალებას იძლევა, რომ ხორცმა თავისი თვისებები 10 წელზე მეტი ხნის განმავლობაშიც კი არ დაკარგოს.

რაც უფრო ხანგრძლივია დავარგების დრო, მით უფრო იზრდება ხორცის ხარისხიც და ღირებულებაც. 15 წლით დავარგებული ხორცის 1 კგ, დაახლოებით, 3200 დოლარი ღირს!

„არ ვამტკიცებ, რომ ჩემი ხორცი საუკეთესოა მსოფლიოში, რადგან ყველა ხორცი თავისებურად უნიკალურია. ეს ისევეა, როგორც ღვინო, თუმცა მე ვიყენებ სრულიად უნიკალურ დავარგების პროცესს და ვარ პირველი ხორცის მწარმოებელი მსოფლიოში, ვინც ამას აკეთებს“, — ამბობს ალექსანდრე პოლმარი.

პოლმარის ფერმის ხორცზე რესტორნებში მაღალი მოთხოვნაა და რესტორნის სტუმრები რიგს თვეებით ადრე იკავებენ.

ალექსანდრე პოლმარი თავის დავარგებულ ხორცს მხოლოდ რამდენიმე, კარგად გამოცდილ რესტორანს ანდობს და ხშირად პირადად ამოწმებს, რამდენად სწორად ხდება განსაკუთრებული ხორცის მომზადება.