ნომოფობია - ვის აქვს ტელეფონის გარეშე დარჩენის შიში

„ნომოფობია“ (nomophobia) ინგლისური ფრაზის no mobile phone phobia (მობილური ტელეფონის არარსებობის შიში) შემოკლებული ფორმისგან იშვა. ახალ ფობიას უკვე ოფიციალური მოკლე განსაზღვრებაც აქვს.

2019 წლის ბრიტანულმა კვლევამ მამაკაცების 34%-ში და ქალების 52%-ში ნომოფობიის გარკვეული ხარისხი გამოავლინა.

მობილურ ტექნოლოგიებზე ყველაზე დამოკიდებულები 18-24 წლის ახალგაზრდები აღმოჩნდნენ. ბრიტანელმა მკვლევრებმა დაადგინეს, რომ ყოველი მეოთხე ბავშვი სმარტფონზე დამოკიდებულია.

ნომოფობები მობილურ ტელეფონს არასოდეს თიშავენ, გამუდმებით SMS-ებს, ფეისბუკის თუ ინსტაგრამის მიმოწერებს და ელექტრონულ ფოსტას ამოწმებენ, ნერვიულობენ, როდესაც ელემენტი ჯდება. შესაბამისად, ყურადღება ეფანტებათ, დაბნეულები და გაღიზიანებულები არიან.

დადგენილია, რომ ავტომობილის მართვის დროს ტელეფონზე საუბარი ან შეტყობინებების გაგზავნა ბოლო დროს ავტოსაგზაო შემთხვევების მთავარი მიზეზია.

სტატისტიკის თანახმად, საჭესთან ჯდომისას მობილური ტელეფონის გამოყენება ისეთივე საშიშია, როგორც ნასვამ მდგომარეობაში მანქანის მართვა.

ავარიების 25% სწორედაც მძღოლის ყურადღების გაფანტვით გამოწვეულ შემთხვევებზე მოდის.

სიმპტომები, რომლებიც შეიძლება ნომოფობებს ჰქონდეთ:

• შფოთვა
• ტაქიკარდია
• აკვიატებული აზრები
• თავის ტკივილი
• მუცლის ტკივილი.

***

იცით, რისი ეშინოდათ ჰიტლერსა და ნაპოლეონს?

წყარო: yougov.co.uk