რატომ არ ბანაობდნენ ცნობილი ადამიანები?

ცნობილია, რომ თანამედროვეობასთან შედარებით, წარსულში სისუფთავის და ხშირი ბანაობის მოწინააღმდეგე გაცილებით მეტი იყო და მათ შორის ძალიან ცნობილი ადამიანებიც არიან. მაგალითად, გერმანელი კომპოზიტორის ლუდვიგ ვან ბეთჰოვენის მეგობრები მის სახლში, თურმე, ღამით იპარებოდნენ, რათა გენიოსის ტანსაცმელი გაერეცხათ, მაგრამ რატომ არ უყვარდა დიდ მუსიკოსს ბანაობა?

ბეთჰოვენი

გერმანელი კომპოზიტორი კატეგორიულად უარყოფდა აბაზანას, რის გამოც ბევრი ახლობელი დაკარგა. ბეთჰოვენი დარწმუნებული იყო, რომ წყლის მილებს მოწამლული ტყვიისგან ამზადებენ და წყალი, რომელიც ამ მილეში მოედინება, ჯანმრთელობისთვის სახიფათოა. მეგობრები ამას პარანოიად მიიჩნევდნენ, მაგრამ როდესაც კომპოზიტორისგან მომავალი „სურნელება“ ძნელი ასატანი ხდებოდა, მის სახლში იპარებოდნენ და ტანსაცმელს ურეცხავდნენ.

გაგიკვირდებათ და მუსიკოსის შიში უსაფუძვლო არ იყო, რადგან ძველ ტყვიის მილებში გამდინარე წყალი მართლაც სახიფათო გახლდათ. სასმელი წყლიდან ტყვიით მოწამვლის შემთხვევები თანამედროვე მსოფლიოშიც ხდება. მაგალითად, 2014 წელს ამერიკის მიჩიგანის შტატში ტყვიით დაბინძირებული სასმელი წყლით ბავშვები მოიწამლნენ, რასაც დიდი სკანდალი მოჰყვა.

ასევე, ბანაობას, თავისი „რკინის არგუმენტების“ მოშველიებით, არ ცნობდნენ:

მაო ძედუნი

ჩინეთის სახელმწიფო მოღვაწე, ჩინეთის კომუნისტური პარტიის ლიდერი, რომელმაც უდიდესი როლი შეასრულა ჩინეთის სახალხო რესპუბლიკის ისტორიაში, სასოწარკვეთილი ცდილობდა სხვადასხვა გზით სიცოცხლის გახანგრძლივებას. მაგალითად, გარშემორტყმული იყო ქალური ენერგიით და უამრავი ახალგაზრდა საყვარელი ჰყავდა.

მაოს სწამდა, რომ თუ ვეფხვივით მოიქცევი, შეიძლება ვეფხვივით ძლიერი გახდე. ვინაიდან ვეფხვები კბილებს არ იხეხვენ, მაოსთვის პირის ღრუს ჰიგიენა მხოლოდ მწვანე ჩაის გამოვლებით შემოიფარგლებოდა. ამ ჩვევის გამო ჩინელი ლიდერის კბილები მუქმა ნადებმა დაფარა. მაომ ასევე უარი თქვა ბანაობაზე, ამიტომ მსახურები სველი პირსახოცებით წმენდნენ. ცხადია, ცხოვრების ასეთ წესს მაოსთვის უკვდავება არ მოუტანია. პირიქით - ცუდი ჰიგიენის გამო მას სხვადასხვა დაავადება განუვითარდა და 82 წლის ასაკში დაიღუპა.

კარლ მარქსი

გერმანელი ფილოსოფოსი, რომელიც ცნობილია როგორც კაპიტალიზმის კრიტიკული ანალიზის ავტორი, წვრილმანებშიც კი საკუთარი რწმენის ერთგულებას ავლენდა, ერთ მშვენიერ დღეს გადაწყვიტა, არ გამხდარიყო „ბურჟუაზიული ინფექციის“ მსხვერპლი და ბანაობაზე უარი თქვა.

რა თქმა უნდა, ამას კარგი არაფერი მოჰყოლია. მარქსს კანის უამრავი დაავადება გაუჩნდა. მაგალითად, მას ფურუნკულოზი აწუხებდა და ჩირქიან მუწუკებს პირდაპირ თავის ხელნაწერებზე იდენდა. მოგვიანებით, ისტორიკოსები დიდხანს იმტვრევდნენ თავს იმაზე, თუ რა ლაქები იყო მარქსის ხელნაწერებზე.

◻️◻️◻️

დღეს ალბათ, აღარავის სჭირდება იმის შეხსენება თუ რა მნიშვნელოვანია სისუფთავის დაცვა. ფაქტია, რომ ჭუჭყთან ერთად, ადამიანის სხეულში ხვდებიან ბაქტერიები, რომლებსაც სერიოზული დაავადებების გამოწვევა შეუძლიათ. ჭუჭყიანი ხელების და ზოგადად, ჰიგიენის დაცვის პრობლემა განსაკუთრებით აქტუალური კორონავირუსის გავრცელების შემდეგ გახდა.