454 გრ თაფლის საწარმოებლად ფუტკრის ოჯახი 88 500 კმ-ს გადის - ეს იგივეა, რაც დედამიწას ორჯერ შემოუფრინონ

ნექტარინიდან თაფლის მიღების პროცესი ორ ძირითად ეტაპად მიმდინარეობს:

თავდაპირველად შეგროვებული ნექტარი, რომელიც მაღალი ტენიანობით გამოირჩევა, ფუტკრის საჭმლის მომნელებელი ფერმენტებით მუშავდება, რაც რთული შაქრების (საქაროზა) მარტივ შაქრებად (გლუკოზად და ფრუქტოზად) გარდაიქმნის. ამის შემდეგ ფუტკრები დამუშავებულ ნექტარს ექვსკუთხედ ფიჭის უჯრედებში ათავსებენ.

მეორე ეტაპზე ფუტკრები ფრთების მოძრაობით ფიჭიდან ზედმეტ წყალს აორთქლებენ და ტენიანობას 20%-ზე ნაკლებ მაჩვენებლამდე ამცირებენ. ეს პროცესი თაფლს ხანგრძლივი შენახვის უნარს ანიჭებს.

თაფლის წარმოება ფუტკრებისთვის წარმოუდგენლად შრომატევადი და ხანგრძლივი პროცესის შედეგია. ერთი ფუნტი (დაახლოებით, 454 გრამი) თაფლის მისაღებად ფუტკრის ოჯახს, დაახლოებით, 88 500 კმ-ის დაფარვა უწევს, რაც დედამიწის ირგვლივ ორჯერ შემოვლის ტოლფასია. ამ დროის განმავლობაში ფუტკრები, დაახლოებით, ორ მილიონ ყვავილს სტუმრობენ. ნექტრის მოსაგროვებლად თითო ფუტკარი 50–100 ყვავილს სტუმრობს და სკაში ბრუნდება ტვირთით, რომელიც ხშირად მისი სხეულის წონის ნახევარზე მეტია. ჩვეულებრივ, ფუტკრები საკვებს სკიდან, დაახლოებით, 3 კილომეტრის რადიუსში ეძებენ, თუმცა საჭიროების შემთხვევაში შეუძლიათ 8 კილომეტრამდეც იფრინონ!

მიუხედავად იმისა, რომ ფუტკრების მთავარი მიზანი საკუთარი სკისთვის საკვების მოპოვებაა, მათი შრომა გლობალური მნიშვნელობისაა — ნექტრის შეგროვებისას ისინი უნებლიედ ყვავილების დამტვერვას ახდენენ, რაც მცენარეთა ნაყოფიერებისთვის გადამწყვეტ როლს თამაშობს.

ამგვარად, თაფლი მხოლოდ ფასეული საკვები პროდუქტი არაა. ის ეკოსისტემის სრულყოფილი ასახვაა, რომელიც ზუსტად გათვლილ და ჰარმონიულად განაწილებულ შრომას ეფუძნება.

***

რატომ მოჰყვება შიმშილობა დედამიწაზე ფუტკრის გაქრობას?

ბზიკი და ფუტკარი – რა განსხვავებაა მათ შორის და რომელი უფრო საშიშია?

რატომ კვდება ფუტკარი ადამიანის დანესტვრის შემდეგ?

რა მოხდება, თუკი თაფლს ყოველდღიურად მიირთმევთ?