არშემდგარი ეროვნული სიმბოლო - როგორ იქცა ინდაური ამერიკის სადღესასწაულო სუფრის მთავარ კერძად?

იცით საიდან გაჩნდა მადლიერების დღის აღნიშვნის ტრადიცია?

ყველაფერი 1620 წელს დაიწყო, როდესაც ჩრდილოეთ ამერიკაში, თანამედროვე პლიმუტის (მასაჩუსეტსის) მიდამოში ევროპიდან ჩამოსახლებულები დამკვიდრდნენ და პატარა დასახლება დააარსეს.

ახალმოსახლეები სუსხიან ზამთარს ვერ გადაურჩებოდნენ, რომ არა ინდიელების დახმარება, რომლებმაც ევროპელებს მკაცრი კლიმატის პირობებში თავის გატანა ასწავლეს.

ერთი წლის შემდეგ, ევროპიდან გადმოსახლებულებმა პირველი მოსავალი აიღეს და ამ მოვლენის აღსანიშნავად დღესასწაული მოაწყვეს, რომელიც მადლიერების დღის სახელით გახდა ცნობილი.
გადმოცემის თანახმად, დღესასწაულის ერთ-ერთი მთავარი კერძი უგემრიელესი შემწვარი ინდაური იყო. ჩრდილოეთ ამერიკის ტყეები ამ ფრინველით სავსე იყო და მალე ინდაურისგან მომზადებული კერძები არა მხოლოდ მადლიერების დღის, არამედ შობისა და აღდგომის განუყოფელი ნაწილი გახდა.

ტრადიცია ეკონომიკური მოსაზრებებითაც აიხსნება - ძროხის დაკვლა სოჯახო მეურნეობისთვის სერიოზულ დარტყმას ნიშნავდა, ქათმებს კვერცხების გამო უფრთხილდებოდნენ, ხოლო ირმის მონადირება ადვილი საქმე არ გახლდათ. ევროპიდან ჩამოსულებისთვის გემრიელი და ხელმისაწვდომი ინდაური ნამდვილ მაშველ რგოლად იქცა. ის ადვილად მრავლდება, საკვების მხრივ უპრეტენზიოა, სწრაფად იზრდება და წონაში 10 კილოგრამს აღწევს.

ბენჯამინ ფრანკლინი წუხდა, რომ აშშ-ის ეროვნული სიმბოლო, ინდაურის ნაცვლად, თეთრთავა არწივი გახდა. წერილში, რომელიც თავის ქალიშვილს სარას გაუგზავნა, პოლიტიკოსმა არწივი სიზარმაცისთვის გააკრიტიკა, ხოლო ინდაური სიმამაცისა და შთამომავლების დაცვის დროს გამოვლენილი ვაჟკაცობისთვის შეაქო.

ამჟამად აშშ-ში 315 მილიონი ადამიანი ცხოვრობს. ინდაურის ეროვნული ფედერაციის შეფასებით (The National Turkey Federation, NTF), ამერიკელები ყოველ შობას, დაახლოებით, 22 მილიონ ინდაურს მიირთმევენ.
ეს კი ნიშნავს, რომ ინდაურის კერძი ყოველ მეოთხე ოჯახში მზადდება.

აქვე წაიკითხეთ Funtime-სგან გემრიელი რეცეპტი:

საშობაო ინდაური არომატული გულსართით