ოკეანეებში წყლის დინება აჩქარდა - ყურადსაღები პროგნოზები

კვლევამ აჩვენა, რომ დასავლეთის ზედაპირული დინებები 20%-ით უფრო სწრაფი გახდა, ხოლო პოლუსისკენ მიმართული დინებები ჩრდილოეთ ნახევარსფეროში 60%-ით, სამხრეთ ნახევარსფეროში კი 20%-ით აჩქარდა.

ცვლილებები ატმოსფერული ქარების გაძლიერებას უკავშირდება, რომლებიც ოკეანის ზედაპირული დინების აჩქარებას და გაძლიერებას იწვევს.

რა თქმა უნდა, ეს ბუნებრივი მოვლენა კლიმატზე სერიოზულ გავლენას ახდენს. ფრანც ფილიპ ტუჩენის მკვლევართა ჯგუფი გვაფრთხილებს, რომ ასეთმა ძვრებმა შეიძლება ელ-ნინიოსა და ლა ნინიას (La Niña, El Niño) კლიმატური მოვლენების სიხშირეზე და ინტენსივობაზე გავლენა მოახდინოს, რაც მთელ მსოფლიოში ექსტრემალურ ამინდს იწვევს.

ამ პროცესებში მთავარ როლს ეკვატორული თერმოკლინი ანუ ოკეანის თხელი ფენა ასრულებს, სადაც ტემპერატურა მკვეთრად ეცემა. მეცნიერები ვარაუდობენ, რომ თერმოკლინის გაძლიერებამ შეიძლება წყნარი ოკეანის ცენტრალურ ნაწილში ელ-ნინიოს მოვლენების გახშირება გამოიწვიოს, ჩვეული კლიმატის მოდელები შეცვალოს და მრავალი ქვეყნის ეკოსისტემებსა და ეკონომიკაზე იმოქმედოს.

მონაცემების ანალიზისა და ოკეანის დინებათა ცვლილებების რუკის შესადგენად მკვლევრებმა თანამგზავრებიდან მიღებული მონაცემები გამოიყენეს. ამ აღმოჩენამ არა მხოლოდ ნათელი მოჰფინა მიმდინარე კლიმატის ცვლილებებს, არამედ მომავალი ანომალიების უფრო ზუსტი პროგნოზების შემუშავებასაც ეხმარება.

ექსპერტები გვაფრთხილებენ, რომ კლიმატის ცვლილების საკითხებში უმოქმედობა სერიოზულ ეკონომიკურ ზარალს გამოიწვევს. ეკონომისტების გათვლით, თუ გადაუდებელი ზომები არ იქნება მიღებული, კლიმატის კრიზისთან გამკლავების ღირებულება შეიძლება ოთხჯერ გაიზარდოს.

წყნარი ოკეანის დინების აჩქარება კიდევ ერთი საგანგაშო სიგნალია, რომელიც კაცობრიობისგან გადამწყვეტ მოქმედებას მოითხოვს.

ესეც დაგაინტერესებთ:

რატომ არ ერევა ერთმანეთს წყნარი და ატლანტის ოკეანეების წყლები?

9 საყოფაცხოვრებო ნივთი, რომელსაც ეკოლოგიისთვის კატასტროფული შედეგები მოაქვს

წყარო: ahrefs.com