რატომ აღმერთებენ სტამბოლელები კატებს?

გთავაზობთ რამდენიმე ვერსიას:

რელიგიური მოსაზრებით

ამბობენ, რომ მუსლიმების ასეთ დამოკიდებულებას თავად წინასწარმეტყველი მუჰამედი განაპირობებს, რომელსაც კატები ძალიან ჰყვარებია.

ლეგენდის თანახმად, მუჰამედს ძილის დროს ტანსაცმლის სახელოში გველი შეუძვრა, რაც იქვე მყოფმა კატამ შენიშნა, გველი მოკლა და წინასწარმეტყველი გადაარჩინა. მადლიერების ნიშნად მუჰამედმა კატას ცხრა სიცოცხლე აჩუქა.

„კატები მუჰამედს სიწმინდის სიმბოლოდ მიაჩნდა. წინასწარმეტყველი მუსლიმებს მოუწოდებდა, რომ კატას ოჯახის წევრივით მოპყრობოდნენ და მისი ყოლით ეამაყათ“ - ამბობს სტამბოლელი ჟურნალისტი აბდურაჰმან კამბუროღლუ.

მუჰამედის კატებს მეჩეთში შესვლა თავისუფლად შეუძლიათ და იქ თავს სრულფასოვან ბატონ-პატრონებად გრძნობენ. კატები შეიძლება აი-სოფიას კედლებშიც კი შეგხვდეთ.

ბევრი სტამბოლელი დარწმუნებულია, რომ სიკვდილის შემდეგ კატა სამოთხეში ხვდება და ალაჰს იმ ადამიანების შესახებ უამბობს, ვინც მასზე ზრუნავდა. მუსლიმებს სწამთ, რომ ეს სამოთხეში მოსახვედრად მშვენიერი რეკომენდაციაა.

მღრღნელებთან ბრძოლის მიზნით

კატების მიმართ სტამბოლელების სათუთი დამოკიდებულების კიდევ ერთი ვერსიაზე საუბრობს ორგანიზაცია „სტამბოლის კატების“ წარმომადგენელი აიშე საბუნჯუ.

მისი აზრით, სტამბოლში კატების გავრცელება ოსმალეთის დროიდან დაიწყო. იმ დროს სახლებს, ძირითადად, ხისგან აშენებდნენ, რაც მღრღნელების სახლებში მოხვედრას და გამრავლებას აადვილებდა. ვირთხა კი მოგეხსენებათ, რომ მრავალი საშიში დაავადების გადამტანია.

როგორც კი სტამბოლელებმა კატების მომრავლება დაიწყეს, მღრღნელები გაქრნენ და ქალაქმა შვებით ამოისუნთქა.

კიდევ ერთი ვერსიით, კატებმა სტამბოლი საშინელი ეპიდემიისგან იხსნეს. ისტორიულად ცნობილია, რომ მე-8 საუკუნეში ქალაქში შავი ჭირი გაჩნდა. დაავადების გადამტანები ვირთხები იყვნენ, თუმცა კატებმა უმოკლეს დროში ყველა მღრღნელი გაანადგურეს და ქალაქი ინფექციისგან გაწმინდეს.

როგორ ზრუნავენ სტამბოლელები კატებზე?

სტამბოლის ბაღებსა და პარკებში კატების ნამდვილ ქალაქებს ნახავთ - მაგალითად, ნიშანტაშის რაიონში მდებარე მოედანზე, კატებისთვის აშენებულ მრავალდონიან „საცხოვრებელ კომპლექსში" ათობით ფისო ცხოვრობს.

ბევრი სტამბოლელი ცხოველისთვის კომფორტულ სახლს საკუთარი ხელით ამზადებს ან ზოომაღაზიას უკვეთავს და სახლის ან მაღაზიის შესასვლელთან დგამს.

ეზოს კატა სტამბოლის ყველაზე პრესტიჟულ კაფეში რომ შევიდეს და ვიტრინაზე ან მაგიდაზე დაწვეს, არავინ გააძევებს ან გაუბრაზდება. პირიქით, კაფეს სტუმრები გაუღიმებენ, მოეფერებიან და გემრიელი სასუსნავით გაუმასპინძლდებიან.

გაგიკვირდებათ და სტამბოლელ კატებს ეზოს ძაღლებიც კი კარგად ექცევიან. ისინი დიდი ხანია შეეგუნენ, რომ სტამბოლისთვის ფისო მნიშვნელოვანი პერსონაა და მისი დაჩაგვრა არავის ეპატიება.

„დადებითი და უარყოფითი მხარეები"

ვერ ვიტყვით, რომ სტამბოლის ყველა მცხოვრები და განსაკუთრებით სტუმარი უზარმაზარი რაოდენობის კატებთან მეზობლობით აღფრთოვანებულია. ბევრი წუხს, რომ ცხოველები შეიძლება ცოფის გადამტანები გახდნენ.

რა თქმა უნდა, კატაის, როგორც ნებისმიერი თბილსისხლიანი ცხოველის შემთხვევაში, ცოფის გადატანის საფრთხე არსებობს, მაგრამ თურქეთში ცოფით ინფიცირების ყველა შემთხვევიდან (2000 წლიდან 2014 წლამდე ასეთი 21 შემთხვევა იყო) კატა გადამტანი არცერთ შემთხვევაში არ ყოფილა.

სტამბოლის მცხოვრებთა უმრავლესობას სურს, რომ ქალაქში რაც შეიძლება მეტი კატა იყოს. 11 წლის წინათ ადგილობრივმა ხელისუფლებამ ცხოველების ქალაქგარეთ გაყვანა და სპეციალურ თავშესაფრებში განთავსება გადაწყვიტა და შესაბამისი კანონპროექტი წარადგინა, მაგრამ ამ იდეას ქალაქში უზარმაზარი პროტესტი მოჰყვა. ოთხფეხა მეგობრების დასაცავად, ცხოველთა უფლებების დამცველებთან ერთად, ხელოვანი ადამიანები, პოლიტიკოსები და რიგითი მოქალაქეები გაერთიანდნენ.

საბოლოოდ, კანონპროექტი ჩავარდა...

დღეს თურქეთში კატებისა და ძაღლების წინააღმდეგ ჩადენილი დანაშაული ოთხ წლამდე თავისუფლების აღკვეთით ისჯება.