რატომ არ ინგრევა პიზის კოშკი?

დაუჯერებელია, მაგრამ გადახრილმა კოშკმა საუკუნეების მანძილზე საკმაოდ ძლიერ მიწისძვრებს გაუძლო.

2018 წელს გაირკვა, რომ კოშკის უჩვეულო სიმტკიცე იმავე რბილი გრუნტის დამსახურება იყო, თავის დროზე რის გამოც გადაიხარა პიზის კოშკი.

ადვილი მისახვედრი იყო, რომ დახრილობის სწრაფი ზრდა ადრე თუ გვიან კოშკის ნგრევას გამოიწვევდა, ამიტომ მის გადასარჩენად 1990 წელს რთული ოპერაცია დაიწყო, რომელიც 10 წელი გაგრძელდა და 30 მილიონი ევრო დაჯდა!
კოშკის საძირკვლის ჩრდილოეთ ნაწილიდან სპეციალური ბურღით, დაახლოებით, 60 კუბური მეტრი თიხა ამოიღეს. შედეგად, კოშკის დახრილობა 4°-მდე შემცირდა და ის წელიწადში, დაახლოებით, 2 მმ-ით სწორდება.

ცნობისათვის:
პიზის დახრილი კოშკი იტალიის ქალაქ პიზაში მდებარეობს. მისი მშენებლობა 1173 წელს დაწყებულა და 200 წელი გაგრძელებულა. კოშკი ტაძრის სამრეკლოა.

კოშკს გადახრა მშენებლობის პროცესშივე დაუწყია - მაშინ, როცა მე-3 სართული აუგიათ. ამის მიზეზად მშენებლობაში დაშვებული შეცდომები სახელდება - საძირკველი რბილ გრუნტში ჩაუსხამთ და მშენებლობისას კოშკის ქვეშ მიწა ჩარეცხილა.

პიზის გადახრილ კოშკს 294 საფეხური აქვს. კოშკის სიმაღლე ყველაზე დაბალ მხარეს 55,86 მეტრია, ხოლო ყველაზე მაღალ მხარეს - 56,7 მეტრი. კოშკი თეთრი მარმარილოს ქვით არის აშენებული.