ამერიკაში მოტორიზებული თხილამურები გამოიგონეს

შერეული სრიალისთვის განკუთვნილი თხილამურები უნივერსალური სამაგრებით, ჯოხებითა და უკანა ნაწილში დამონტაჟებული ელექტროძრავებით არის აღჭურვილი. ელექტროძრავს ლითიუმ-იონური დამტენი ამუშავებს.

თხილამურების მართვა ერთ-ერთი ჯოხის სახელურიდან ხდება, რომელშიც უსადენო პულტია ჩამონტაჟებული. მისი საშუალებით შეგიძლიათ: სიჩქარეს მოუმატოთ ან დაამუხრუჭოთ და მოძრაობის რეჟიმები გადართოთ.

თხილამურს ძრავა და დამტენი მარტივად ეხსნება. ეს ნიშნავს, რომ ადამიანს შეუძლია მთაზე ელექტროძრავის დახმარებით ავიდეს, შემდეგ ის ზურგჩანთაში შეინახოს და დაღმართზე სრიალით დაეშვას. რაც მთავარია – საბაგიროსთან რიგში დგომა აღარ მოგიწევთ.

კომპანია Frigid Dynamics-ის ოფიციალურ ვებგვერდზე წერია, რომ თხილამურები, ორი ძრავი და დამყენი 2999 დოლარი ღირს. მოტორიზებული თხილამურები ჯერჯერობით მხოლოდ ევროპის ქვეყნებში, კანადასა და აშშ-ში გაიყიდება.

პრაქტიკული თვალსაზრისით, 3000 დოლარი საკმაოდ სოლიდური თანხაა და ამ ფასად მეორადი, მაგრამ კარგ მდგომარეობაში მყოფი თოვლმავლის (Snowmobile) ყიდვა შეიძლება, თუმცა, მწარმოებლები ამ შემთხვევაში, ფსონს არა სიმძლავრეზე, არამედ კომპაქტურობაზე დებენ. მათი ლოგიკა დაახლოებით ასეთია:

• თოვლმავალის გადატანას მისაბმელი სჭირდება, თხილამურები კი ნებისმიერი მანქანის საბარგულში ეტევა.
• თოვლმავალს ფარეხი სჭირდება, თხილამურები კი შეგიძლიათ კარადის კუთხეშიც კი მიაყუდოთ.
• დაბოლოს, ეკოლოგია - თხილამურების ელექტროძრავი ჩუმად მუშაობს და ჰაერს არ აბინძურებს, რაც ზოგიერთ დაცულ ზონაში გადამწყვეტია.