ჩაის დაყენების წესები მსოფლიოს 20 ქვეყნიდან

იაპონია - ამომავალი მზის ქვეყანაში ძალიან უყვართ მატჩა - უმაღლესი ხარისხის, დაფქული მწვანე ჩაი. 1 ჩაის კოვზ ფხვნილს ასხამენ 1 ჭიქა ცხელ, მაგრამ აუდუღარ წყალს და სწრაფად ურევენ ერთგვაროვან კონსისტენციამდე ქაფის წარმოქმნით.

საფრანგეთი - აქ ყველაზე გავრცელებული „ფრანგული ჩაი“ შემდეგნაირად მზადდება: მაგარი შავი ჩიას ფოთლები, ფორთოხლის პატარა ნაჭერი, მწიკვი მუსკატი და ორი კოვზი კონიაკი.

ინდოეთი - „დარჯილინგი“ ინდოეთის მაღალმთიან რაიონებში მოჰყავთ. მას პიკანტური მოტკბილო-მომჟავო გემო და მდიდარი ფერი აქვს. მსოფლიოში ამ სასმელს ხშირად უწოდებენ „ჩაის შამპანურს“. 5 გრ ჩაის ფოთოლს ასხამენ 200 გრ ადუღებულ წყალს ნელ-ნელა - 3 ნაწილად და ყოველ ჯერზე აცდიან 20-30 წამს.

დიდი ბრიტანეთი - როგორ უყვართ ინგლისელებს ჩაი, ეს საყოველთაოდ ცნობილი ამბავია. ჩაის სმის ტრადიცია ამ ქვეყანაში საუკუნეებია, არსებობს. ჩაის დაყენების ინგლისური საიდუმლო კი ასეთია: მაღალხარისხიანი Earl Grey და, რა თქმა უნდა, ცოტა თბილი რძე.

რუსეთი - დიდი ხანია, წარსულს ჩაბარდა რუსული სამოვარი, თუმცა ამ ქვეყანაში ჩაის სმა დღესაც ძალიან უყვართ. შავი ჩაის მუქი ნაყენი, შაქრითა და ლიმონით - სწორედ ამ ვარიანტს უწოდებენ მთელ მსოფლიოში „რუსულ ჩაის“.

მავრიტანია - ისევე, როგორც ჩრდილოეთ აფრიკის ქვეყნების უმრავლესობაში, მავრიტანიაშიც უყვართ მწვანე ჩაი პიტნით. აქ ჩაის სმის თავისებური მეთოდი აქვთ - ერთ ჯერზე სვამენ 3 ჭიქას. იწყებენ უშაქროთი, შემდეგ ნაკლებ შაქრიანზე გადადიან და ამთავრებენ კარგად დატკბილულით.

ტაილანდი - აქ წყურვილის მოსაკლავად სვამენ ჩაის. ტაილანდური ჩაი სხვადასხვა ბალახების, რძისა და ყინულის კუბიკების ნარევია.

პაკისტანი - Masala-ჩაი პაკისტანელების საყვარელი სასმელია. მზადდება შემდეგი რეცეპტით: ძლიერი შავი ჩაი, რძე, თაფლი და სხვადასხვა სანელებლები.

სამხრეთ აფრიკის რესპუბლიკა - აქაური როიბუში, სასმელი წითელბუჩქოვანი მცენარისგან, შესანიშნავი არჩევანია. არ შეიცავს კოფეინს, შესაბამისად, მაღალი წნევისა თუ უძილობის მიზეზი ვერ გახდება, სამაგიეროდ შეიცავს დიდი ოდენობით ვიტამინ C-ს, სპილენძსა და ფტორს.

აშშ - ამერიკაში პოპულარული სასმელია Americano и Ice-tea. როგორ მოვამზადოთ ჩაი ამერიკულად? ძალიან მარტივად: შავი ჩაის ნაყენი, შაქარი, ლიმონი და სულ ცოტა სოდიანი წყალი, გემოს დასარბილებლად.

არგენტინა - არგენტინელებს უყვართ მატე - მარადმწვანე პარაგვაული ჩაის გამხმარი, დაფშვნილი ფოთლებისგან დამზადებული ნაყენი. ის არგენტინაში კანონით განსაზღვრულია, როგორც „ეროვნული სასმელი“. მატეს სვამენ სპეციალური ჭიქით - გოგრისგან დამზადებული, საწრუპიანი სასმისით.

მაროკო - აქ უყვართ ძლიერი მწვანე ჩაი, სურნელოვანი პიტნითა და ცაცხვით.

ყატარი - ჩაი Karak საოცრად არომატული სასმელია. შავი ჩაის ნაყენს ემატება რძე, შაქარი, ცოტა კოჭა და კარდამონი.

ეგვიპტე - კარკადე ამ ქვეყნის ნაციონალური სასმელია, რომელიც სუდანური ვარდის ყვავილებისგან მზადდება. მოიასამნისფრო-მოწითალო ან ჟოლოსფერია, ამიტომ მას წითელ ჩაისაც უწოდებენ. ვარდის გამხმარ ფოთლებს მდუღარე წყალს ასხამენ და ცოტა ხანს თავდახურულ ჭურჭელში აყოვნებენ. სულ ეს არის. სხვათა შორის, არ უხდება არანაირი დანამატი.

თურქეთი - მართალია, ყავის ქვეყანაა, მაგრამ აქ ჩაიც არანაკლებ უყვართ. ამზადებენ შავი ჩაისგან და კარგად ატკბობენ. თურქული ჩაის სმის თავისებურება უსახელურო ფინჯანია, რომელიც აუცილებლად გამჭვირვალე მინით უნდა იყოს დამზადებული.

ჩინეთი - ჩინეთში ჩაი უყვართ და პატივს სცემენ. ყველაზე გავრცელებული სახეობაა „პუერ“ - პიკანტური გემოს მქონე ეს ჩაი სპეციფიკური ტექნოლოგიით მზადდება და ამის წყალობით არასდროს ძველდება.

ტიბეტი - ცნობილი ჩასუიმა ტიბეტელი ბერების სასმელია. ის ზეთოვანი კონსისტენციის არის, მის დაყენებას რამდენიმე საათი სჭირდება, შემდეგ უმატებენ კარაქს, მარილს და ფიალებით მიირთმევენ.

ჰონკონგი - აქაურებს ძალიან უყვართ საკუთარი, სპეციფიკური მეთოდით მომზადებული ჩაი, რომელსაც ხალხში „ჩულქის ჩაის“ უწოდებენ: გაციებულ შავ ჩაის უმატებენ შედედებულ რძესა და ყინულს. შემდეგ რამდენიმეჯერ ატარებენ ფილტრში, რომელსაც ქალის ჩულქის ფორმა აქვს. სასმელი გამოდის ნაზი და ფაფუკი.

ტაივანი - ტაივანში საკმაოდ გავრცელებული სასმელია „ბურთულებიანი“ ჩაი, იგივე Bubble tea, როგორც მსოფლიოში იცნობენ. მას სხვადასხვაგვარად ამზადებენ: შავი ან მწვანე ჩაის ფოთლებით, სხვადასხვა სიროფისა და რძის დამატებით, და, რა თქმა უნდა, უცვლელი ინგრედიენტით - ეს არის ტაპიოკის (უმი მანიოკისგან დამზადებული ბურღული) ბურთულები.

მალაიზია - ამ სამხრეთ აზიურ ქვეყანაში ძალიან უყვართ Teh tarik , რომელიც სრულად ანაცვლებს დესერტს. მისი მომზადება ძალიან მარტივია: შავი ჩაი, რძე, ყინულის კუბიკები ერთმანეთში უნდა აურიოთ და კარგად ათქვიფოთ - სქელი ქაფის წარმოქმნამდე.