საკნატუნო ამბები

თავბრუდამხვევი სილამაზის 365 ოთახი - სამეძანოს ციხესიმაგრე

fun time

16:00 ხუთ. 23 მარტი, 2023 წელი

სამეცანოს ციხესიმაგრე,
ტოსკანა

14
დაკოპირებულია

ტოსკანა ცენტრალური იტალიის გამორჩეული რეგიონია, რომელიც ულამაზესი პეიზაჟებით, უგემრიელესი სამზარეულოთი და საუკეთესო ღვინოებითაა ცნობილი. გარდა ამისა, აქ არქიტექტურისა და ისტორიის თვალსაზრისითაც უამრავი საინტერესო ადგილი მდებარეობს და სამეძანოს ციხე (Castello di Sammezzano) - ტოსკანის უცნობი მარგალიტი - ერთ-ერთი მათგანია.

სამეძანოს ციხეს ფლორენციიდან 30 კილომეტრში, ქალაქ ლეციოს მახლობლად ნახავთ.

იტალიისთვის უჩვეულო, მავრიტანული სტილის სასახლე თვალისმომჭრელად ლამაზია და დანახვისთანავე მოგხიბლავთ.

ციხესიმაგრის დიდი და პატარა ოთახების შეერთების ადგილას უამრავი ნიშა, საიდუმლო კუთხე და ფართო გალერეაა. ფანჯრები, სვეტები, ლაბირინთები, თაღები, გუმბათები და ისევ გუმბათები - შეიძლება თავბრუ დაგესხას...

აქ ერთი ოთახი მეორეს არ ჰგავს, განსაკუთრებულია და დახვეწილობით გამოირჩევა.

ციხესიმაგრეში, წელიწადის დღეების მსგავსად, 365 ოთახია და ყოველი მათგანი თავისი დიდებულებით გაოცებს: თეთრი დარბაზი, შროშანების დარბაზი, ფარშევანგების დარბაზი...

თეთრი დარბაზი მაქმანებიან საქორწილო კაბას, მისი ჭერი კი უიშვიათესი სილამაზის ფიფქს წააგავს. ფარშევანგების დარბაზი ნამდვილი მიწიერი სამოთხეა! მისი ფერადი კომპოზიცია საოცარი ფრინველის ათასფრად მოლივლივე კუდს მოგაგონებთ, ხოლო ჭერზე ულამაზესი ორნამენტები გადაშლილა.

სამეძანოს ციხე 780 წელს აშენდა! საუკუნეების მანძილზე ის იმპერატორებსა და მეფეებს ეკუთვნოდა.

***

ციხესიმაგრის დღევანდელი იერი ესპანელი დიდგვაროვანის, მარკიზ ფერდინანდ ხიმენეს დ’არაგონის დამსახურებაა, რომელმაც ის მემკვიდრეობით მიიღო. ხიმენეს დ’არაგონების ოჯახს ეს სასახლე ჯერ კიდევ მედიჩების ეპოქაში შეუსყიდია.

მარკიზი 1853 წელს ის ერთდროულად დამკვეთიც იყო და არქიტექტორიც, როდესაც ციხესიმაგრის ციტადელი მავრიტანულ სტილში გადააკეთა. ახლა შენობის ფასადი ცნობილ ტაჯ-მაჰალს წააგავს, ინტერიერი კი XIII საუკუნის ესპანურ ციხესიმაგრე ალგამბრას.

მარკიზი ცნობილი იყო, როგორც შესანიშნავი არქიტექტორი, ინჟინერი, ბოტანიკოსი, ბიბლიოფილი, მეწარმე და ქველმოქმედი, რომელმაც ეროვნული ბიბლიოთეკის შექმნას პირადი არქივის ნაწილი შესწირა.

თანამედროვეებს მარკიზ ფერდინანდ ხიმენეს დ’არაგონი უცნაურ ადამიანად მიაჩნდათ და მის ბევრ იდეას სკეპტიკურად აღიქვამდნენ. თუმცა, ციხესიმაგრეს რეკონსტრუქცია სწორედ ამ დახვეწილი გემოვნების მქონე უცნაურმა კაცმა ჩაუტარა. მან მშენებლობა არა მარტო დააფინანსა, არამედ პროექტიც თავად შექმნა და სამუშაოსაც თავად ხელმძღვანელობდა.

მეორე მსოფლიო ომის შემდეგ სამეძანოში სასტუმრო ფუნქციონირებდა, რომელიც 1999 წელს აუქციონზე გაიყიდა. მას შემდეგ ციხესიმაგრეში არავინ ცხოვრობს, გაჭიანურებული სამართლებრივი დავების გამო ამ ულამაზეს ოთახებში ჯერჯერობით სრული მდუმარებაა.

***

მიტოვებული იტალია - 10 ქალაქი მოჩვენება, სადაც დრო გაჩერდა

10 საოცარი სასამართლო დარბაზი იტალიაში

მუმიების ქალაქი იტალიაში


სიახლეები ამავე კატეგორიიდან

რით გარდაიცვალა „მსოფლიოში ყველაზე...

რით გარდაიცვალა
„მსოფლიოში ყველაზე
ჭუჭყიანი ადამიანი“

70 ცოლი და 210 შვილი - ვინ იყო კაცი...

სვაზილენდის სამეფოს
ისტორია

რატომ ღებავენ შვეიცარიის ციხეებში ს...

ვარდისფერი საკნები

ელისაბედ II-ს ყველა შვილი ბუნებრივ...

დედოფალი ელისაბედი და
პატარა ჩარლზი

ევროპის 16 პატარა ქალაქი და სოფელი,...

Burano, იტალია

იაპონელებმა პლაჟზე დამსხვრეული მინა...

ქალაქ ომურას მინის პლაჟი

ჩინეთში ქუჩაში უცხო ადამიანის დახმა...

ჩინეთში უცხო ადამიანების
დახმარება კანონით ისჯება

ბავარიის ალპებში ჩაკარგული მოხატული...

სოფელი ობერამერგაუ

ჩინეთში ერთი ოჯახის წევრებმა ერთმან...

ჩინეთში ერთი ოჯახის
წევრებმა ერთმანეთზე 23-ჯერ
იქორწინეს