სტუმრად თემურ ჩხეიძის დიდ ოჯახში

რეჟისორ თემურ ჩხეიძის დიდი ოჯახისთვის ერთად შეკრება ნამდვილად არ არის ადვილი საქმე. ოჯახის ყველა უფროსი წევრი მუშაობს, ზოგი უცხოეთში სწავლობს... თუმცა ახალი წლის, შობის ან სხვა დიდი დღესასწაულის ერთად გატარებას ყოველთვის ცდილობენ. როცა სახლში ყველა თავს იყრის, ეს დიდი ზეიმია.

დიდი მაესტრო ქალიშვილებთან ერთად - ეკა, თეონა და დეა ჩხეიძეები.

მეუღლე ნანი ჩიქვინიძე, შვილი დეა ჩხეიძე და შვილიშვილი ნიკა მაღრაძე

როცა სახლშია, ძირითად დროს კაბინეტში ატარებს. კითხულობს, მუშაობს... მისი სპექტაკლებიც სწორედ აქ, ამ ოთახში „იბადებიან“... ასეთია დიდი არტისტის მუშაობის სტილი... უყვარს, როცა ტელევიზორი რომელიმე სპორტულ არხზეა ჩართული, შესაძლოა, არც უყურებდეს, თუმცა აუცილებლად ჩართული უნდა იყოს...

ხუთი შვილიშვილის ბაბუა ბავშვებთან ურთიერთობისას თავადაც პატარა ბავშვად იქცევა ხოლმე... დიდხანს განიცდის, თუ რომელიმე მათგანს შენიშვნას მისცემს. ახლა მისთვის ყველაზე სასიამოვნო პროცესი სწორედ შვილიშვილებთან დროის გატარებაა...

ჩვენს მასპინძელს სახლში ყოფნა ყველაფერს ურჩევნია. მიუხედავად იმისა, რომ პროფესიის გამო ხშირად უწევდა მოგზაურობა, სახლი მისთვის მაინც სამყაროს ცენტრია. ასე მიაჩვია ოჯახის წევრებიც... სადმე წასვლას ამჯობინებს, სტუმრები მასთან მივიდნენ. სახლი მისი საუბრის მუდმივი თემაა.

ნანი ჩიქვინიძე და თემურ ჩხეიძე

დები ჩხეიძეები:

დეა ინგლისური ენის სპეციალისტია, თეონა - მუსიკოსი, ამჟამად გერმანიაში ცხოვრობს და მოღვაწეობს, ეკას კი, მარჯანიშვილის თეატრის მსახიობს, კარგად იცნობს ქართველი მაყურებელი.

შვილიშვილებთან ერთად - დათა მუშკუდიანი, ნიკა მაღრაძე, თემურ მაღრაძე. ბატონ თემურს, მათ გარდა, კიდევ ორი შვილიშვილი ჰყავს - ინანო მუშკუდიანი და ანა მაღრაძე.