რატომ არ ეზრდებათ ინდიელ მამაკაცებს წვერი?

1. აზიური რასა

ყველაფერი პრეისტორიულ ეპოქაში დაიწყო, როდესაც პირველყოფილი ადამიანები აფრიკის კონტინენტიდან მთელ დედამიწაზე გავრცელდნენ. მათი ნაწილი აღმოსავლეთისკენ წავიდა, ნაწილი ციმბირისკენ და ჩინეთისკენ. ჩუკოტკის მიმართულებით მოძრავი ჯგუფიდან, რომელიც მონღოლოიდურ რასად ჩამოყალიბდა, ათიათასობით ადამიანი ამერიკაში გადავიდა და კონტინენტის კოლონიზაცია მოახდინა. როგორ? 40 ათასი წლის წინ, გამყინვარების ეპოქაში, დღევანდელი ბერინგის სრუტის ადგილზე ზღვის ნაცვლად, ხმელეთი იყო, სადაც მამონტები დარბოდნენ და ამერიკაში ფეხით გადასვლა სრულიად შესაძლებელი გახლდათ. ჩუკოტკიდან ამერიკაში გადასული ადამიანები მონღოლოიდური რასის ინდიელები გახდნენ, რომელთა განსაკუთრებული ნიშანი სახეზე თმის არარსებობაა.

2. სახეზე თმა მხოლოდ ცხოველებს აქვთ

დიახ, ამერიკელ ინდიელებს ასე ეგონათ, ამიტომ წარმოიდგინეთ, რა განიცადეს, როდესაც ამერიკაში გემით ჩასული წვერ-ულვაშიანი ევროპელები დაინახეს.

3. სახეზე თმის მოცილება

ვინაიდან სახეზე თმა მამაკაცურობის ნაცვლად, ცხოველთა სამყაროსთან ასოცირდებოდა, ინდიელები სახიდან წარბებსაც კი საგულდაგულოდ იცილებდნენ. ევროპელების მოსვლამდე ამერიკაში საპარსი არ არსებობდა, ამიტომ თმის მოსაცილებლად ძვლისგან დამზადებულ მაშებს იყენებდნენ. ინდიელ მამაკაცებს თავის მოვლისთვის უამრავი დრო ჰქონდათ, რადგან ოჯახის საქმეები და შვილების გაზრდა ქალის მოვალეობებში შედიოდა. მამაკაცებს თავისუფლად შეეძლოთ ნადირობისა და თამბაქოს მოწევას შორის შუალედებში სახის ვიზუალზე ეზრუნათ და ასეც იქცეოდნენ.

4. ევროპელებთან შერევა

ბრიტანელების, ესპანელებისა და ფრანგების მიერ ამერიკის კოლონიზაციისა და კანადის შექმნის შემდეგ, კონტინენტზე შერეული ოჯახები გაჩნდა. ევროპულ გენებთან ერთად, ინდიელებში წვერისა და ულვაშის მოდაც გაჩნდა, თუმცა დღევანდელ რეზერვაციებშიც ბევრია ინდიელი, რომელსაც წინაპრების მსგავსად, სახეზე თმა არ ამოსდის და წვერის გაპარსვა არ სჭირდება.