რატომ მალავენ კატები საკუთარ ექსკრემენტებს?

თავის გადარჩენა

ველურ ბუნებაში კატისებრთა ოჯახის წარმომადგენლებს განსაკუთრებული ადგილი ეკავათ - ისინი მტაცებლებიც იყვნენ და ამავდროულად, დიდი ზომის ცხოველების ნანადირევსაც წარმოადგენდნენ. ასეთი შუალედური პოზიცია სპეციალური დამცავი მექანიზმების შემუშავებას მოითხოვდა.

ექსკრემენტების დამალვა ველური კატებისთვის გადარჩენის ერთ-ერთ ყველაზე მნიშვნელოვან სტრატეგიად იქცა. ამ ინსტინქტის დახმარებით კატები დიდ მტაცებლებსაც ემალებოდნენ და პოტენციურ ნანადირევსაც. შესაბამისად, წარმატებული ნადირობის შანსებიც იზრდებოდა და საფრთხეებისგან თავის დაცვისაც.

ისეთი დიდი კატებისგან განსხვავებით, როგორიც ლომი ან ვეფხვია, რომლებიც ძალის დემონსტრირებისთვის ნიშანს გამოსაჩენ ადგილზე ტოვებენ, პატარა ველური კატები ფარულად მოქმედებას ამჯობინებდნენ. სწორედ ეს სტრატეგია მიიღეს მემკვიდრეობით ჩვენმა შინაურმა კატებმა.

ტერიტორიული კომუნიკაცია

ფერომონები ბიოლოგიურად აქტიური ნივთიერებებია, რომლებსაც სასიგნალო მნიშვნელობა აქვთ. ისინი ცხოველების სპეციალურ ჯირკვლებში გამომუშავდება და გარემოში გამოიყოფა.

ცხოველების ექსკრემენტები ადამიანის თვალისთვის უხილავ სიგნალებს შეიცავს და სახეობის სხვა წევრებს მნიშვნელოვან ინფორმაციას აწვდის.

„კატების საზოგადოებაში“ არსებობს იერარქია, სადაც ინდივიდების ქცევა პირდაპირ მათ სოციალურ სტატუსზეა დამოკიდებული. დომინანტი კატები ხშირად განგებ ტოვებენ კვალს თვალსაჩინო ადგილზე, რითაც ხაზს უსვამენ თავიანთ დომინირებას. მათგან განსხვავებით, სუსტი კატა ცდილობს, ნაკლებად შესამჩნევი იყოს და საგულდაგულოდ ნიღბავს თავისი ყოფნის კვალს.

ტერიტორიის მონიშვნის პროცესი რთული საკომუნიკაციო სისტემაა, სადაც თითოეული ნიშანი კონკრეტული გზავნილია. შინაური კატები კომუნიკაციის ამ უძველესი მეთოდის გამოყენებას დღემდე აგრძელებენ.

ჰიგიენური ასპექტები

კატები სისუფთავით განთქმულნი არიან. ამ ფუმფულა არსებებს შეუძლიათ დღის 30% თავის მოვლას დაუთმონ. საკვებისა და წყლის ჯამების სუფთად შენახვა კატის ქცევის მნიშვნელოვანი მახასიათებელია. თანამედროვე შინაურმა კატებმა ეს თვისება შეინარჩუნეს, ამიტომ ძალიან მნიშვნელოვანია, რომ ტუალეტის ყუთი საკვებისა და წყლის თასებისგან მოშორებით იდგეს.

ექსკრემენტების დამალვით, კატები მინიმუმამდე ამცირებენ სხვადასხვა დაავადების გავრცელების რისკს და იცავენ საკუთარ თავს და ტერიტორიას პოტენციური საფრთხეებისგან.

***

ასე რომ, ექსკრემენტების დამალვა ევოლუციის შედეგად ჩამოყალიბებული ქცევითი მექანიზმია, რომელიც რამდენიმე მნიშვნელოვან ფუნქციას აერთიანებს: მტაცებლებისგან დაცვას, ტერიტორიის მონიშვნას და ჰიგიენის დაცვას. თანამედროვე შინაურმა კატებმა ეს უძველესი ინსტინქტები შეინარჩუნეს, მიუხედავად იმისა, რომ დღეს მათი საჭიროება აღარაა.

ესეც საინტერესოა:

რატომ არ უყვარს კატას ბანაობა?

რომელი ჯიშის კატა ცოცხლობს ყველაზე დიდხანს?

რა მოხდება, თუკი კატა „ულვაშს დაკარგავს“?