როგორ იქცა ამერიკული აბრევიატურა OK მსოფლიოს ყველა ხალხის მეტყველების ნაწილად

ჟურნალისტური ხუმრობა

თუ ფიქრობთ, რომ სიტყვა OK ხანგრძლივი ფიქრისა და ლინგვისტური პროცესების შედეგად გაჩნდა, ცდებით. ის 1839 წლის 23 მარტს დაიბადა და პირველი ადამიანი, ვინც ეს ასოთაშეხამება გამოიყენა, ბოსტონური გაზეთის - Boston Morning Post-ის რედაქტორი ჩარლზ გორდონ გრინი იყო. გრინი ერთ-ერთ სტატიაში კონკურენტს გაეხუმრა და დაწერა აბრევიატურა „OK“, რაც „oll korrect“-ს (all correct - ყველაფერი რიგზეა) არასწორად წარმოთქმულ ვერსიას ნიშნავდა. იმ დროს იუმორისტული აბრევიატურები და თვალსაჩინო შეცდომები მოდური იყო და ჟურნალისტმა გრამატიკული შეცდომა შეგნებულად დაუშვა.

პოლიტიკური დევიზი

აღსანიშნავია, რომ ყოველდღიურ ცხოვრებაში სწორედ OK დამკვიდრდა და არა რომელიმე სხვა. შემდეგი ადამიანი, რომელმაც ახალი სიტყვის პოპულარიზაციას ხელი შეუწყო, ამერიკის შეერთებული შტატების მერვე პრეზიდენტი მარტინ ვან ბურენი გახდა.

ხალხში მას ზედმეტ სახელად „Old Kinderhook“-ს (ძველი კინდერჰუკი —პოლიტიკოსის მშობლიური ქალაქი) ეძახდნენ. მოგვიანებით, ვან ბურენის მომხრეებმა შექმნეს კლუბი სახელად „O.K. Club“. მისი დევიზი გახდა ფრაზა: „Old Kinderhook is O.K.“ (ძველი კინდერჰუკი მაგარია). ეს ფრაზა ელვისებურად გავრცელდა და არნახული პოპულარობა მოიპოვა.

ტექნიკური პროგრესი

მოგვიანებით ყველაფერი ტექნიკურმა პროგრესმა გადაწყვიტა. OK გამოსაყენებლად ძალიან მოხერხებული აღმოჩნდა — მოკლე, ტევადი და თანაც რამდენიმე მნიშვნელობის მქონე. ეს სიტყვა გახდა იდეალური სტანდარტი მორზეს ანბანით შეტყობინებების მიღების დასადასტურებლად — ის დროს ზოგავდა და გაშიფვრის პროცესში გაუგებრობას არ იწვევდა.

ამერიკელებმა მისი მუდმივი გამოყენება XIX საუკუნის ბოლოს დაიწყეს, XX საუკუნეში კი უკვე მთელ მსოფლიოში გავრცელდა. კინომ და მუსიკამ OK სწრაფად აქციეს სხვადასხვა ქვეყნის კულტურის ნაწილად და ის საერთაშორისო კომუნიკაციის საუკეთესო ინსტრუმენტი გახდა.

აშშ-ს ექსპრეზიდენტი მარტინ ვან ბურენი

როგორ გამოიყენება OK?

როგორც უკვე აღვნიშნეთ, OK საკმაოდ უნივერსალურია, ამიტომ მას როგორც არაფორმალურ ურთიერთობებში, ისე ოფიციალურ ტექსტებშიც იყენებენ. მას აგზავნიან შეთავაზების ან თხოვნის პასუხად, მისი მეშვეობით გამოხატავენ თანხმობას, სიხარულს ან გაგებას.