როგორ უნდა მოიქცეთ, თუ ხანძრის ზონაში მოყევით

თუ ტყეში მცირე ხანძრის კერას წააწყდით, დაუყოვნებლივ მიიღეთ ზომები მის შესაჩერებლად და ამავდროულად, უახლოეს დასახლებულ პუნქტში დახმარებისთვის ვინმე გაგზავნეთ.

ტყის მცირე ხანძართან გამკლავება 3-5 ადამიანს ნახევარ საათში შეუძლია, თანაც სპეციალური საშუალებების გარეშე - ხის ტოტების, ბრეზენტის ან ტანსაცმლის დახმარებით:

ცეცხლს უკან, მისი წარმოშობის კერისკენ უნდა დავახევინოთ. პატარ-პატარა კერები კი ფეხით ჩავაქროთ.
ხანძრის ჩაქრობის ეფექტური და გავრცელებული მეთოდი ცეცხლზე მიწის მიყრაა. თავდაპირველად, ცეცხლის ალზე ნიჩაბს ურტყამენ და მიწას აყრიან. შემდეგ კი ცეცხლის კერის გარშემო რამდენიმე სანტიმეტრის სისქისა და, დაახლოებით, ნახევარი მეტრის სიგანის მიწის უწყვეტ, დამცავ ზოლს ავლებენ. ამ მეთოდით, ერთ ადამიანს შეუძლია, ნახევარ საათში 20-მეტრიანი მიწის დამცავი ზოლი გააკეთოს.

თუ ხედავთ, რომ ტყის ხანძართან დამოუკიდებლად გამკლავებას ვერ შეძლებთ, რაც შეიძლება სწრაფად და სწორად გაეცალეთ ტერიტორიას:

გაითვალისწინეთ, რომ ადამიანს წუთში 80 მეტრის გავლა შეუძლია, ხანძარი კი წუთში 1-დან 3 მეტრამდე ტერიტორიას ედება. ცეცხლმოკიდებული ტერიტორიიდან გამოსვლისას უნდა იმოძრაოთ ქარის საპირისპირო მხარეს, ხანძრის კერის პერპენდიკულარულად. სასურველია, მდინარეს ან ნაკადულს გაჰყვეთ.

ძლიერი დაკვამლიანების დროს, ცხვირი და პირი სველი ნაჭრით, პირსახოცით ან ტანსაცმლის ნაწილით აიხვიეთ.

როცა ხანძარი სტიქიად იქცევა და ადამიანების სიცოცხლეს ემუქრება, მოსახლეობის დაცვის მიზნით ტარდება მთელი რიგი ღონისძიებები. სტიქიის ზონაში, ცეცხლის ჩაქრობის სამუშაოებში ერთვება მძიმე ტექნიკა და საჯარისო შენაერთები. აუცილებლობის შემთხვევაში, ხდება ადამიანების ევაკუაცია. სახლების დატოვების წინ, თუ ამის დრო არის, ადამიანები პირად ნივთებსა და ტანსაცმელს ქვისგან აშენებულ ნაგებობებში ინახავენ ან მიწაში მარხავენ.

თუ ევაკუაცია იგვიანებს, ადამიანებმა თავი ჰერმეტულად ნაგებ ქვის შენობებს, ღია, გაშლილ სივრცეებს ან სტადიონებს უნდა შეაფარონ.

გახსოვდეთ, გაცილებით ადვილია ხანძრის თავიდან აცილება, ვიდრე მასთან ბრძოლა!