ვისგან იცავდნენ ბრიტანელები საფლავებს?

fun time

21:54 პარ. 22 ივლისი

დაკოპირებულია

მე-18 საუკუნეში, ბრიტანეთის სამედიცინო სასწავლებლის სტუდენტები რთულ მდგომარეობაში აღმოჩნდნენ - მანამდე ანატომიის შესასწავლად სიკვდილით დასჯილი დამნაშავეების ცხედრებს იყენებდნენ, მაგრამ კანონმდებლობის შეცვლისა და სასჯელების შემსუბუქების შემდეგ, სიკვდილმისჯილთა რაოდენობა მკვეთრად, შემცირდა.

სწორედ ამის შემდეგ ქვეყანაში საფლავებიდან გვამების მოპარვის შემთხვევები გახშირდა და გარდაცვლილთა ახლობლები იძულებული გახდნენ, რომ საგანგებო ზომები მიეღოთ.

საფლავის დამცავი პირველი სეიფი სასაფლაოზე დაახლოებით 1816 წელს გამოჩნდა. სანახევროდ მიწაში ჩაფლული, მძიმე ლითონის გისოსებისა და უზარმაზარი ქვის კომბინაციით შექმნილი სეიფის ადგილიდან დაძვრა თითქმის შესუძლებელი იყო, რაც გარდაცვლილს ქურდებისგან საიმედოდ იცავდა.

თუმცა, გვამების ქურდები უკან დახევას არ აპირებდნენ. საფლავის დამცავი სეიფის გამოჩენის შემდეგ მათ მეთოდები დახვეწეს და საფლავებიდან 6 მეტრის დაშორებით გვირაბების თხრა და მიცვალებულების გვირაბიდან გატანა დაიწყეს. ამ გზით გაძარცვულ საფლავს გარედან უჩვეულო არაფერი ეტყობოდა, თუმცა მოგვიანებით, სასაფლაოს სიახლოვეს უამრავი ცარიელი კუბო ნახეს და მიხვდნენ, რომ მძარცველებმა საფლავების მცველებს ეშმაკობით აჯობეს.

საფლავის სეიფების ეპოქა 1832 წელს დასრულდა, როდესაც ექიმებს უპატრონო გვამების გამოყენების უფლება მიეცათ.

თუმცა, ზოგი სეიფი ადგილზე დარჩა, როგორც ბრიტანეთში გვამებზე ნადირობის სამარცხვინო ეპოქის ილუსტრაცია.