იურული პერიოდის გირჩი - საინტერესო ფაქტები ფიჭვის შესახებ, რომელმაც დინოზავრების ეპოქიდან მოაღწია
18:02 ორშ. 17 ივნისი
არაუკარიისებრთა ოჯახის ფიჭვი (Araucaria Bidwillii), რომელიც უზარმაზარ, გემრიელ გირჩებს ისხამს, დედამიწაზე 200 მილიონი წლის წინ ხარობდა, როდესაც აქ დინოზავრები ცხოვრობდნენ. ჩვენს დროში ფიჭვის ეს სახეობა ავსტრალიასა და ოკეანეთში ხარობს, ხოლო მისი ახლო ნათესავები ჩილესა და ბრაზილიაში შეგხვდებათ.
ჩვეულებრივ, არაუკარია 50 მეტრამდე სიმაღლის იზრდება, თუმცა არის შემთხვევები, როდესაც ფიჭვის სიმაღლემ 90 მეტრს მიაღწია. შედარებისთვის, თავისუფლების ქანდაკების სიმაღლე 93 მეტრია, მსოფლიოში ყველაზე მაღალი ხის, Hyperion sequoia-ის სიმაღლე კი 116 მეტრს აღწევს.
***
არაუკარიას ფიჭვს, წიწვების ნაცვლად, ფოთლები აქვს, მაგრამ ისინი წიწვებზე უარესად იჩხვლიტებიან. ეს თავდაცვის მექანიზმია, რადგან ფაუნის წარმომადგენელთა შორის მცენარის გემრიელი ქერქით და ფოთლებით პირის ჩატკბარუნების მსურველი საკმაოდ ბევრია. არაუკარია, მართალია, ხის ქერქსა და ფოთლებს თვალისჩინივით უფრთხილდება, მაგრამ გირჩების და თესლების გავრცელებით, პირიქით, დაინტერესებულია და ყველას „გულუხვად სთავაზობს“. ბალახისმჭამელი დინოზავრებისთვის არაუკარიას უზარმაზარი გირჩები დელიკატესად ითვლებოდა, რამაც ხელი შეუწყო ხეების გავრცელებას.
***
გიგანტური გირჩი ამ საოცარი ფიჭვის ყველაზე საინტერესო ნაწილია. გირჩები, დაახლოებით, რაგბის ბურთის ზომამდე იზრდება და ერთის წონა 10 კილოგრამს აღემატება.
ადგილობრივებში არაუკარია წმინდა ხედ ითვლება, თუმცა მის ჩრდილში წამოწოლა და დასვენება საკმაოდ საშიშია, რადგან ხიდან ჩამოვარდნილმა გირჩმა შეიძლება სერიოზულად დაგაზიანოთ, რაც ავსტრალიელებს არაერთხელ გამოუცდიათ.
გირჩს ძალიან გემრიელი თესლი აქვს, რომელსაც ადგილობრივები უძველესი დროიდან მიირთმევენ. ბევრი თესლს ფქვავს და ფქვილისგან პურს აცხობს.
გამოყენებამდე გირჩის თესლს წყალში რამდენიმე საათის განმავლობაში ალბობენ, შემდეგ ხარშავენ ან აცხობენ და მიირთმევენ.
სიახლეები ამავე კატეგორიიდან