სოფელი კუნძულზე, სადაც ჭადრის ხეს „სისხლი“ სდის

fun time

18:24 შაბ. 7 სექტემბერი

დაკოპირებულია

თურქულ ქალაქ ბურსადან 40 კილომეტრის დაშორებით ლამაზი სოფელი გოლიაზი (ძველად აპოლონია) მდებარეობს, რომელიც მნახველის ყურადღებას თავისი უჩვეულო გეოგრაფიით იპყრობს.

საქმე ისაა, რომ სოფელი გოლიაზი ულუბატის ტბაში მდებარე პაწაწინა კუნძულზე მდებარეობს, რომელიც ხმელეთს გრძელი ხიდით უკავშირდება.

აპოლონია ჩვენს წელთაღრიცხვამდე VI საუკუნეში დაარსდა, კუნძული კი ოდესღაც აპოლონიის სამეფოს დედაქალაქი ყოფილა.

გოლიაზი ძველი ბერძნული სოფელია, რომლის მოსახლეობა ყოველთვის თევზაობით იყო დაკავებული. დღეს სოფელში მცხოვრებთა უმეტესობა თურქი მიგრანტია.

ზუსტად ასი წლის წინ, 1924 წელს, თურქეთსა და საბერძნეთს შორის დადებული სამშვიდობო ხელშეკრულების ფარგლებში, ბერძნულ-თურქული მოსახლეობის იძულებითი გაცვლა განხორციელდა - მართლმადიდებელი ბერძნები თურქეთის ტერიტორიიდან საბერძნეთში გადაასახლეს, სადაც მათ სოფელი, სახელად აპოლონია დააარსეს.

***

სოფელი გოლიაზი იდეალური ადგილია იმისთვის, რომ ქალაქის აურზაურისგან მოშორებით, ბუნების სიმშვიდით დატკბეთ. სოფლის მოედანზე 750 წლის მტირალა ტირიფი დგას. ტირიფის ტოტებიდან მუქი წითელი სითხე წვეთავს, რომელიც სისხლს მოგვაგონებს.

„სისხლიანი ტირიფის“ გვერდით განთავსებულ სტენდზე დატანილია ლეგენდა, რომელიც თურქი ჭაბუკისა და ბერძენი ქალიშვილის სიყვარულზე მოგვითხრობს. შეყვარებულების ბედნიერებას გოგონას ძმამ წერტილი დაუსვა და შეყვარებულ ვაჟს გული ხანჯლით გაუპო. სისხლით მოსვრილი ჭაბუკი იმ ჭადრის ქვეშ მოკვდა, რომელიც შეყვარებულების საიდუმლო პაემნების მხილველი იყო. გოგონამ მწუხარებას ვერ გაუძლო და მალე იმავე ჭადარზე თავი ჩამოიხრჩო. მას შემდეგ, ჭადარი ორი ხალხის მტრობის მძევლებს სისხლიანი ცრემლებით გლოვობს.

***

კუნძულზე რომის იმპერიის დროინდელი ციხესიმაგრის ნანგრევებს და მე-19 საუკუნის წმინდა პანტელეიმონის ეკლესიას ნახავთ, რომელიც ამჟამად კულტურული ცენტრის ფუნქციას ასრულებს.

ულუბატის მტკნარი ტბა ტექტონიკური წარმოშობისაა, რომელშიც მტკნარი წყლის თევზები: კობრი, კეფალი, ლოქო, გველთევზა და კიბო ბინადრობს.

სანაპიროს პატარა თევზის რესტორნები მდებარეობს, რომლებიც სტუმრებს უგემრიელეს თევზის კერძებს სთავაზობენ. აქ შეგიძლიათ ადგილობრივი მეთევზეებისგან ახლად დაჭერილი თევზი შეიძინოთ. კუნძულზე მამაკაცებიც თევზაობენ, ქალებიც და ბავშვებიც.