ლავენჰემი - დახრილი სახლების სოფელი ინგლისში

ლავენჰემს (Lavenham) ძალიან საინტერესო ისტორია აქვს.

შუა საუკუნეებში, ის ნისლიანი ალბიონის ყველაზე მდიდარი ქალაქი იყო, სადაც საუკეთესო ქსოვილებს აწარმოებდნენ. ქსოვილების შესაძენად ლავენჰემში ვაჭრები მთელი ინგლისიდან ჩადიოდნენ.

ამ ქალაქიდან ხაზინაში შესული გადასახადები მნიშვნელოვნად აღემატებოდა ისეთი დიდი ქალაქების გადახდილ სახაზინო თანხებს, როგორებიც იყო იორკი და ლივერპული.

ლავენჰემს საცხოვრებლად უამრავი ხალხი მიაწყდა და დაიწყო სახლების სახელდახელოდ შენება. ნაჩქარევად ნაკეთებ საქმეს ყოველთვის თავისი შედეგები მოჰყვება - საშენ მასალად ხშირად ნესტიან ფიცრებს იყენებდნენ, ამიტომ დროთა განმავლობაში, შენობების უმეტესობა გვერდზე დაიხარა.

მოგვიანებით, ქალაქი გაკოტრდა და ჩვეულებრივ პროვინციულ სოფლად გადაიქცა, რომლის მოსახლეობას დახრილი სახლების შეკეთების არც საშუალება და ახლა უკვე, როგორც ჩანს, აღარც სურვილი აქვს.