მეცნიერულად დადასტურდა, რომ ძაღლებს ადამიანის ენა ესმით

მკვლევრებმა აღმოაჩინეს, რომ ღილაკების გამოყენებას მიჩვეული ძაღლები გარკვეულ სიტყვებს აღიქვამენ და მათზე შესაბამისად რეაგირებენ. იმის მიუხედავად, პატრონი წარმოთქვამდა, უცხო ადამიანი თუ ღილაკი, ძაღლები სწორად რეაგირებდნენ სიტყვებზე: „თამაში“ და „გარეთ“. ეს იმაზე მეტყველებს, რომ ძაღლები მხოლოდ პატრონის სხეულის ენას კი არ კითხულობენ, არამედ ნამდვილად ესმით სიტყვები და მათ შინაარსს ამუშავებენ.

„ჩვენმა კვლევამ დაასრულა საზოგადოებაში არსებული ეჭვები იმასთან დაკავშირებით, შეუძლიათ თუ არა ძაღლებს სიტყვების მნიშვნელობის გააზრება. შედეგები აჩვენებს, რომ ძაღლები უშუალოდ სიტყვებზე რეაგირებენ და არა თანმდევ სიგნალებზე“.

კვლევა ორ ურთიერთდაკავშირებულ ექსპერიმენტს მოიცავდა. პირველში 30 ძაღლი და მათი პატრონი მონაწილეობდა, სადაც დამკვირვებლები ძაღლების ღილაკებზე რეაქციას აკვირდებოდნენ, მეორეში კი 29 ძაღლის პატრონი ცდებს დამოუკიდებლად, დისტანციური ინსტრუქციების მიხედვით ატარებდა. კვლევის სანდოობას განსაკუთრებით ის გარემოება ამყარებს, რომ მისი მეთოდოლოგია ოფიციალურად დარეგისტრირებული იყო.

ეს ნაშრომი სრულიად ახალ ჰორიზონტს ხსნის ადამიანისა და შინაური ცხოველის ურთიერთობის შემდგომი კვლევისთვის და ძაღლების შემეცნებითი სამყაროს სიღრმისეულ გააზრებაში გვეხმარება.

***

გთავაზობთ რამდენიმე საინტერესო ფაქტს ჩვენი ოთხფეხა მეგობრების გონიერების შესახებ:

ძაღლებს ესმით რას ამბობთ (კონკრეტული სიტყვა) და როგორ ამბობთ (ტონი). მაგალითად, სიტყვა „სეირნობა“ რომ ჩვეულებრივი, მშვიდი ხმით თქვათ, მაინც მიხვდება, რას ნიშნავს.

ის თქვენს ლაპარაკს უწყვეტ ხმაურად კი არ აღიქვამს, არამედ სიტყვების ერთმანეთისგან გარჩევას ახერხებს (დაახლოებით ისე, როგორც პატარა ბავშვი სწავლობს მოსმენას).

ძაღლს საშუალოდ, 100-ზე მეტი სიტყვისა და ფრაზის მნიშვნელობა ესმის.

ცუგა ნამდვილი ფსიქოლოგია: სიტყვების გარდა, შესანიშნავად ხვდება ჩვენს ჟესტებს, გამოხედვასა და ხასიათს.

მოკლედ რომ ვთქვათ, როცა ესაუბრებით, მას ნამდვილად ესმის თქვენი.