სადაურია ინდაური? — ფრინველი, რომელსაც თავისიანად არავინ აღიარებს

არც ერთ ქვეყანას არ სურს, ფრინველი „თავისიანად“ აღიაროს და ყველა ერთხმად ცდილობს, რაც შეიძლება შორს გაგზავნოს.

ებრაულად მას tarnegol hodu-ს („ინდურ ქათამს“) ეძახიან,

ფრანგულად — dinde („ინდოეთიდან“),

თურქულად — hindi,

ნიდერლანდურსა და სკანდინავიურ ენებში მისი სახელი (kalkoen, kalkun) ინდოეთის პორტს კოლკატას უკავშირდება.

ინგლისურში ყველაფერი კიდევ უფრო მოულოდნელია — ფრინველს სახელი - turkey თურქეთის პატივსაცემად დაარქვეს.

თუმცა, ეს ყველაფერი როდია.

პორტუგალიურში (peru), ხორვატულსა (puran) და ჰინდიზეც კი (peru), ინდაურს პერუს უკავშირებენ. ირლანდიურში ის „ფრანგული ქათმია“ (cearc Fhrancach), ბრეტონულში — „ესპანური ქათამი“ (yar Spagn), ხოლო მალაიურში „ჰოლანდიური ქათამი“ (ayam belanda).

არადა, ყველასგან უარყოფილი ინდაური, რომელიც საშობაო სუფრის განუყრელ ნაწილად იქცა, გამორჩეული ფრინველია, რომლის შესახებაც ბევრი უცნობი და საინტერესო ფაქტი არსებობს:

✔️ ემოციური „ინდიკატორი“: ინდაურის თავისა და კისრის ფერი ფრინველის განწყობაზე მიგვანიშნებს. როდესაც ინდაური აღგზნებული ან გაბრაზებულია, მისი კანი მკვეთრ წითელ, ცისფერ ან თეთრ ფერს იღებს.

✔️ ხედვის არეალი: ინდაურს თითქმის 360-გრადუსიანი ხედვა აქვს. თვალების განლაგება საშუალებას აძლევს, დაინახოს ისიც კი, რაც მის უკან ხდება, ეს კი ბუნებაში გადარჩენისთვის აუცილებელია.

✔️ სირბილის და ფრენის უნარი: მიუხედავად იმისა, რომ შინაური ინდაური საკმაოდ მძიმეა, გარეული ინდაურები საათში 40 კილომეტრამდე სიჩქარით დარბიან, ხოლო ფრენისას მათმა სიჩქარემ შეიძლება საათში 80-90 კილომეტრსაც მიაღწიოს.

✔️ ძილის ჩვევები: გარეული ინდაურები ღამეს ხეებზე ათევენ. ეს მათ მტაცებლებისგან (მაგალითად, მელიებისგან ან მგლებისგან) თავდაცვაში ეხმარება.

✔️ ინტელექტი: კვლევები აჩვენებს, რომ ინდაურებს აქვთ უნარი, ერთმანეთი ხმითა და გარეგნობით იცნონ. მათ ასევე შეუძლიათ ტერიტორიის რუკა დაიმახსოვრონ და გზა ადვილად გაიკვლიონ.

✔️ ბენჯამინ ფრანკლინი და ინდაური: არსებობს ლეგენდა, რომ აშშ-ის ერთ-ერთ დამფუძნებელს, ბენჯამინ ფრანკლინს სურდა, რომ ქვეყნის ეროვნული სიმბოლო არა თეთრთავა არწივი, არამედ ინდაური ყოფილიყო. ის თვლიდა, რომ ინდაური ბევრად უფრო „პატიოსანი“ და მამაცი ფრინველია.

✔️ ინდაურის კუჭი შეიცავს სპეციალურ განყოფილებას, რომელსაც „კუნთოვანი კუჭი“ ჰქვია. ის იმდენად ძლიერია, რომ ფრინველს შეუძლია მასში მოხვედრილი პატარა ქვებიც კი გადაამუშაოს.

***

როგორ იქცა ინდაური ამერიკის სადღესასწაულო სუფრის მთავარ კერძად?