უგემრიელესი შოკოლადის ჩურჩხელა (ცოტა ზარმაცებისთვის)

ამ უგემრიელეს ნუგბარს საქართველოს აღმოსავლეთსა და დასავლეთში განსხვავებულად ამზადებენ: აღმოსავლური ჩურჩხელა ყურძნის წვენისა და პურის ფქვილისგან მოდუღებული თათარით და ნიგვზით მზადდება, დასავლური ჯანჯუხა კი - ყურძნის წვენისა და მჭადის ფქვილისგან მოდუღებული ფელამუშით და თხილით. თუმცა, არსებობს კიდევ ერთი სახეობის ჩურჩხელა, რომელსაც აღმოსავლეთსაც და დასავლეთშიც გემრიელად მიირთმევენ - ეს შოკოლადის ჩურჩხელა გახლავთ.

საჭირო პროდუქტი:

• თხილი, ნიგოზი ან ნუში - 300 გრ. (გულსართისთვის);
• თეთრი ან შავი შოკოლადის ფილა (შეიძლება ე.წ. შოკოლადის ღილებიც) - 4 ან 5 ცალი;
• აბრეშუმის ან ბამბის ძაფი - თვალის ზომით.

მომზადება:

1. დავიწყოთ საჩურჩხელე თხილისთვის კანის გაცილებით. ამისათვის თხილი (ნიგოზი ან ნუში) ტაფაზე დაყარეთ და დაბალ ცეცხლზე დადგით, თან ხის კოვზით ურიეთ, რომ არ დაიწვას.
   როცა შეატყობთ, რომ თხილს კანი ეცლება, გადმოდგით ცეცხლიდან და ხელის მოსმით მოაცილეთ. (თხილისთვის კანის მოცილება სხვანაირადაც შეიძლება - ჩაყარეთ თხილი პატარა ჯამში, დაასხით წყალი და წამოადუღეთ. ამის შემდეგ ცივი წყალი გადავავლთ და კანი ხელით მოაცილეთ).
2. აბრეშუმის ან ბამბის ძაფი დაჭერით სასურველ ზომაზე (შოკოლადის ჩურჩხელა ჩვეულებრივზე მოკლე უნდა იყოს) და ძაფის ბოლო განასკვეთ.
3. 5 ან 6 ცალი თხილის გული ძაფზე ააცვით. ასე გააგრძელეთ თხილის რაოდენობის ამოწურვამდე;
4. თეთრი ან შავი შოკოლადის 4 ან 5 ფილა (შეიძლება ე.წ. შოკოლადის ღილებიც) დაამტვრიეთ, მოათავსეთ ჯამში და გაადნეთ წყლის აბაზანაზე ან მიკროტალღურ ღუმელში.
5. გამდნარ შოკოლადში ძაფზე ასხმული თხილი სათითაოდ ამოავლეთ და დაკიდეთ ისე, რომ ერთმანეთს არ მიეკროს. თუ საჭიროა, ჩურჩხელები გამდნარ შოკოლადში მეორედაც ამოავლეთ, თუმცა ამ შემთხვევაში გაცილებით მეტი შოკოლადის ფილა დაგჭირდებათ.

გემრიელად მიირთვით!