ისრაელი და მისი მისტიკა

თოვლი და წვიმა დასავლეთის კედელზე

მისტიკური ისრაელის გაცნობა უმჯობესია იერუსალიმიდან დაიწყოთ. იერუსალიმი ზღვის დონიდან 820 მეტრზე, იუდეის უდაბნოს გვერდით მდებარეობს. მაშინაც როცა წვიმს, ქალაქში შეიძლება მზე ანათებდეს.

მას ხშირად „წვიმის ჩრდილში“ მდებარე უდაბნოს უწოდებენ. მთებში წნევის ცვლილების გამო, ღრუბლები ქალაქის თავზე ტრიალებენ და წვიმას იწვევენ, შემდეგ კი გზას აგრძელებენ.

იერუსალიმის მოსანახულებლად თებერვალი იდეალური დროა - არ ცხელა, დეკემბერ-იანვართან შედარებით ნაკლებად წვიმს და ქალაქში არც ისე ბევრი ტურისტია.

იერუსალიმში პირველად დასავლეთის ანუ გოდების კედელი უნდა ნახოთ. აქ ყოველთვის ბევრი ხალხია. ერთადერთხელ მოხდა, როდესაც კედელთან თხუთმეტი წუთის განმავლობაში არავინ მდგარა და ეს 2013 წელს მოხდა, როდესაც ისრაელში თოვლი მოვიდა.

გეთსიმანიის ბაღი

იერუსალიმის ერთ-ერთი წმინდა ადგილი, რომელიც მაცხოვრის სახელს უკავშირდება, გეთსიმანიის ბაღია. ამ ულამაზეს ბაღში 700-800 წლის ზეთისხილის ხეები ხარობს, რომლებსაც ბიბლიური მოვლენები არ უნახავთ, მაგრამ გასული საუკუნის ოციან წლებში, არქიტექტორ ანტონიო ბარლუცის დიზაინით აგებულ ყველა ერის ეკლესიაში შემორჩენილია უძველესი მოზაიკა და ქვა, რომელზედაც იესო ქისტემ თავისუფლების ბოლო ღამეს ილოცა.

14 გაჩერება მწუხარების გზაზე (ვია დოლოროსაზე)

იერუსალიმში მიწისქვეშა ქალაქიც უნდა მოინახულოთ. მიწისქვეშა ლაბირინთებში მოჩანს გოდების კედელი, რომელსაც ორი ათასი წელია, ადამიანის ხელი არ უნახავს. სწორედ მიწისქვეშა კედელში მდებარეობს უნიკალური, ცამეტი მეტრი სიგრძის ქვა. ამ დრომდე უცნობია როგორ შეძლეს ამ ქვის აწევა.

ტურისტები და მომლოცველები იერუსალიმში იესო ქრისტეს უკანასკნელ გზას გადიან გასამართლების ადგილიდან ჯვარცმისა და დაკრძალვის ადგილამდე. მანძილი 600 მეტრია.

ამ გზაზე მოხდა სხვადასხვა მოვლენები, რომლებმაც შეაჩერეს მწუხარე მსვლელობა. დღეისთვის კანონიზებულია 14 გაჩერება, აქედან ცხრა გაჩერება მოხსენიებულია სახარებაში, ხოლო დანარჩენი ტრადიციებსა და ლეგენდებს განეკუთვნება.

მწუხარების გზის თოთხმეტი გაჩერება:

1. პონტიუს პილატეს მიერ იესოსთვის მსჯავრის გამოტანა
2. იესოს მიერ ჯვრის აღება
3. იესოს მიერ ჯვრით პირველი ნაბიჯის გადადგმა
4. იესოს შეხვედრა დედასთან
5. მაცხოვრის წაქცევა
6. ვერონიკა მაცხოვარს სახეს უმშრალებს
7. იესოს მიერ ჯვრის ტარება სიმონ კვირინელთან ერთად
8. იესოს საუბარი ქალებთან
9. მაცხოვრის მესამე სვლის დასაწყისი
10. მაცხოვრისათვის კვართის და მოსასხამის გახდა
11. იესუს ჯვარზე გაკვრა
12. იესოს ჯვარზე სიკვდილი
13. იესოს ჯვრიდან გარდამოხსნა
14. იესოს სამარხში ჩასვენება.

გზა სწორედ იესოს საფლავზე აგებულ, წმინდა სამარხის ეკლესიაში მთავრდება, საიდანაც ყველას შეუძლია წმინდა ცეცხლის წაღება.

კაბალას ცენტრი

თუ იერუსალიმიდან ჩრდილოეთით იუდეის უდაბნოს, გალილეის ზღვისა და მთების გავლით წახვალთ, ებრაელთა ოთხი წმინდა ქალაქიდან ერთ-ერთში - წმინდა ქალაქ ცფათში მოხვდებით.

სწორედ ამ ქალაქში გადასახლდნენ მე-15 საუკუნეში მისტიკური რაბინები, რომლებიც ინკვიზიციას გაურბოდნენ. ეს ქალაქი კაბალას დედაქალაქად ითვლება.

„დედამიწაზე ოთხი სტიქიაა: ცეცხლი, ჰაერი, დედამიწა და წყალი. წმინდა მიწაზე კი ოთხი წმინდა ქალაქია: იერუსალიმი, ხებრონი, ტიბერია და ცფათი,“ - ამბობენ ადგილობრივები.

ცფათი მხატვრების, მეთოჯინეებისა და მესანთლეების ქალაქია, სადაც თითქმის ყველა ფანჯარა და კარი ცისფერია.

ადგილობრივი მცხოვრებლები ჰყვებიან, რომ 1948 წელს, ცფათის სინაგოგაში ლოცვის დროს, ჭურვის ნაწილი ჩავარდა, მაგრამ არავინ დაუზიანებია. ეს ერთ-ერთი სასწაული, რომელიც ამ საოცარ ქალაქში ხდება.

ჯვაროსნები და ზოდიაქოს ნიშნები

გზა ცფათიდან თელ-ავივამდე ხმელთაშუა ზღვის ნაპირის გასწვრივ გადის. აქ შეხვდებით უძველეს და უნიკალურ ქალაქ აკოს, რომლის მიწისქვეშა ლაბირინთებს ჯვაროსნების შემოსევა ახსოვთ.

აკო 4000 წელზე მეტისაა. მითების თანახმად, ჰერკულესმა აქ სამკურნალო ბალახები აღმოაჩინა, მაგრამ აკო ყველაზე ცნობილი ჯვაროსნული ლაშქრობების ეპოქაში გახდა. ის იყო იერუსალიმის ჯვაროსანთა სამეფოს დედაქალაქი პალესტინაში.

ქალაქში ტამპლიერის საიდუმლო გვირაბი არც ისე დიდი ხნის წინ - 1994 წელს საკანალიზაციო სისტემის რემონტის დროს აღმოაჩინეს.

აკოს ჯვაროსანთა მიწისქვეშა დარბაზები თითქმის პირვანდელი სახითაა შემონახული, მაგრამ პორტის ტერიტორიაზე არსებული უზარმაზარი ციხე, სადაც ტამპლიერთა სიმდიდრე ინახებოდა, სრულიად განადგურდა.

მისტიკური ისრაელის ტურს თელ-ავივი, უფრო სწორად მისი ძველი ქალაქი იაფა აგრძელებს. სწორედ აქ ჩამოდიოდნენ გემები, რომლებსაც იერუსალიმისკენ მიმავალი მომლოცველები გადაჰყავდათ.

დღეს ძველი ქალაქის ქუჩები ზოდიაქოს ნიშნების სახელებს ატარებენ. ასევე, აქვე შეგიძლიათ სურვილების ხიდი ნახოთ. ამბობენ, რომ თუ ხიდზე საკუთარ ზოდიაქოს ნიშანს იპოვით და ხელისგულებს დააფარებთ, სურვილი აგისრულდებათ. იაფას ზოგიერთი ამბავი პეტრე მოციქულს უკავშირდება, მაგრამ ქალაქს პერსევსის შესახებ ლეგენდებიც ახსოვს.

ისრაელის ქალაქები ათასწლიანი ისტორიისგან განუყოფელნი არიან, რაც ამ უნიკალური ქვეყნის ატმოსფეროს სრულიად განუმეორებელს ხდის.

***

9 საინტერესო ფაქტი ისრაელის შესახებ

8 მკაცრი აკრძალვა ისრაელის არმიის ჯარისკაცებისთვის

რა დანიშნულება აქვს ებრაელებისთვის პატარა ქუდს, რომელსაც კიპას ეძახიან?

რატომ გადადის ებრაელებში ეროვნება დედის ხაზით?