კრეიგ ლუისი - პირველი ადამიანი გულის გარეშე!

ბილი კონმა და ბად ფრეიზერმა პაციენტს გული ამოჰკვეთეს და მის ადგილას აპარატი ჩადგეს, რომელიც გულის არარსებობის პირობებში, ორგანიზმს სისხლის უწყვეტი მიწოდებით უზრუნველყოფდა. ოპერაციას 48 საათი დასჭირდა!

ოპერაციიდან რამდენიმე დღის შემდეგ პაციენტი გონს მოვიდა და განაცხადა, რომ თავს შესანიშნავად გრძნობს.

ჟურნალისტებთან საუბრისას ექიმებმა აღნიშნეს, რომ სანამ აპარატს ცოცხალ ადამიანზე გამოცდიდნენ, 50-მდე ექსპერიმენტი ხბოებზე ჩაატარეს. ოპერაციის შემდეგ ხბოები ყველაფერს ძველებურად აკეთებდნენ: ეძინათ, ჭამდნენ და დარბოდნენ. უბრალოდ, მათი სისხლი ვენებისკენ გულის კუნთების კი არა, აპარატის საშუალებით მოძრაობდა.

„კრეიგ ლუისის სტეტოსკოპით მოსმენისას, გულისცემა არ ისმის, ხოლო კარდიოგრამის აპარატზე შეერთებისას, სწორ ზოლს დაინახავთ, რომელიც სიკვდილს აფიქსირებს. ამის მიუხედავად, პაციენტი ცოცხალია და უგულობას არ უჩივის“, - ამბობდა ექიმი კონი ოპერაციის შემდეგ.

მსოფლიოში პირველი უგულო ადამიანის ცოლისთვის კი ლუისი ისევ ისეთი იყო, როგორც ადრე, უბრალოდ, პულსი არ ჰქონდა.

მართალია, ოპერაციამ წარმატებით ჩაიარა, მაგრამ პაციენტს სხვა ორგანოებიც დაავადებული ჰქონდა. ოპერაციიდან 5 კვირის შემდეგ კრეიგ ლუისს თირკმლის უკმარისობა განუვითარდა და ოჯახმა ჰუმანური გადაწყვეტილება მიიღო - გულის აპარატის გამორთვა ითხოვა, რათა კრეიგისთვის მშვიდად გარდაცვალების საშუალება მიეცათ.

მოგვიანებით პრესკონფერენციაზე ექიმებმა დაადასტურეს, რომ ხელოვნური გული შეუფერხებლად მუშაობდა და პაციენტი თირკმლის უკმარისობით გარდაიცვალა.