რატომ უჭირს კატას ხიდან ჩამოსვლა, თუკი წამებში ადის?

კატას ხეზე ასვლას შიში ან ნადირობის ნაიძულებს. და აი, ძაღლი, რომელიც მისდევდა, დიდი ხანია, თავის გზაზე წავიდა, ჩიტიც გაფრინდა, კატა კი ხეზე ზის და ჩამოსვლას არ ცდილობს. რატომ ხდება ასე და უნდა დავეხმაროთ ფისოს თუ არა?

კატებს ძლიერი სხეული, მოქნილი ხერხემალი და ბასრი კლანჭები აქვს, თუმცა ერთი პრობლემა არსებობს - კატის კლანჭები ისეა მოხრილი, რომ მათი ხის ქერქში ჩარჭობა მხოლოდ ზევით მოძრაობის დროსაა მოსახერხებელი, თავით ქვევით დაშვებისთვის კლანჭების ასეთი ფორმა სრულიად გამოუსადეგარია.

ხეზე ასული კატის დაბლა ჩამოსვლის ერთადერთი გზაა უკან-უკან დაშვება და სწორედ ესაა მთავარი სირთულე - როგორ უნდა იმოძრაოს კატამ უკან-უკან, როცა ვერ ხედავს, სად მიდის? სტრესში ჩავარდნილი კატები სხვადასხვანაირად იქცევიან: ზოგი შიშისგან გაუნძრევლად ზის, ზოგი ხის ტოტებზე დადის და არემარეს კნავილით აყრუებს.

ბევრი კატა, როცა ხვდება, რომ მისი დამხმარე არავინაა, საბოლოოდ, დამოუკიდებლად ჩამოსვლას ახერხებს, თუმცა ზოგიერთი ცხოველი ხეზე რჩება და შიმშილისა და წყურვილისგან იტანჯება. თუ კატა ხეზე ერთ დღე-ღამეზე მეტია ზის, ეს ნიშნავს, რომ მან ნამდვილად არ იცის, როგორ ჩამოვიდეს.

ამ შემთხვევაში პროფესიონალებს უნდა მიმართოთ, რომლებსაც სიმაღლეზე მუშაობის გამოცდილება და სპეციალური აღჭურვილობა აქვთ. მათ ასევე სქელი ხელთათმანები სჭირდებათ, რათა შეშინებული ცხოველი უსაფრთხოდ დაიჭირონ.

გაითვალისწინეთ, რომ ხალხმრავლობის დანახვაზე კატამ შეიძლება ხიდან გადმოხტომა გადაწყვიტოს, ამიტომ სთხოვეთ გამვლელებს, რომ ხეს მოშორდნენ, რათა ცხოველმა არავის ავნოს.

***

რატომ არ უნდა შეეხოთ კატას თათებზე

როგორ ითხოვს კატა დახმარებას - 4 სიგნალი, რომელიც არ უნდა გამოგეპაროთ