ზღვის მარილი კურნავს? - მითები და რეალობა
15:37 კვი. 25 იანვარი
„ის უამრავ მინერალს შეიცავს“, „წნევის მატებას არ იწვევს“, „ბუნებრივი პროდუქტია“ - ზღვის მარილს რა თვისებას არ მიაწერენ... მისი შემადგენლობა ჩვეულებრივი სუფრის მარილისგან მართლაც განსხვავდება, მაგრამ ღირს თუ არა ერთის მეორით ჩანაცვლება ჯანსაღი ცხოვრების წესის თვალსაზრისით?
რით განსხვავდება ზღვის მარილი ჩვეულებრივი მარილისგან?
მარილი ადამიანის მენიუს მნიშვნელოვანი ნაწილია, რომელიც ორგანიზმში უამრავ როლს ასრულებს - მარილის იონები წყლისა და მარილის ოპტიმალურ ბალანსს ინარჩუნებენ, კუჭის წვენის გამომუშავებაში მონაწილეობენ და ნერვულ იმპულსებსაც კი ატარებენ.
სამზარეულოში უმეტესად, ჩვეულებრივ სუფრის მარილს ვიყენებთ, თუმცა, ბოლო წლებში ზღვის მარილი სულ უფრო პოპულარული ხდება. რით განსხვავდება ის?
ზღვის მარილი ზღვის წყლის ბუნებრივი აორთქლების გზით მიიღება, რაც მას საშუალებას აძლევს ისეთი მინერალები შეინარჩუნოს, როგორიცაა მაგნიუმი, კალიუმი, იოდი და რკინა. სუფრის მარილი, როგორც წესი, უფრო რთულ დამუშავებას გადის - მინარევებისგან გაწმენდის პროცესში ის მინერალების უმეტესობას კარგავს, რის შედეგადაც თითქმის სუფთა ნატრიუმის ქლორიდი რჩება.
ზღვის მარილი კოსმეტოლოგიაში
მისი შემადგენლობისა და წარმოების მეთოდის გათვალისწინებით, ზღვის მარილი უფრო სასარგებლო ჩანს და ბოლო დროს, სულ უფრო ფართოდ იყენებენ კოსმეტოლოგიაში.
მიიჩნევა, რომ ზღვის მარილი კანის ანთებას ამცირებს, ჭრილობის შეხორცებას აჩქარებს და სისხლის მიმოქცევას აუმჯობესებს.
რას ამბობს მეცნიერება?
თუ სუფრისა და ზღვის მარილს მიკროსკოპით დავაკვირდებით, დავინახავთ, რომ ზღვის მარილი მართლაც შეიცავს მაგნიუმს, კალიუმსა და კალციუმს, თუმცა, მათი შემცველობა იმდენად დაბალია, რომ ჯანმრთელობაზე მნიშვნელოვანი გავლენის მოხდენა არ შეუძლია. თქვენ შეგიძლიათ ამ მინერალებზე მოთხოვნილება ისეთი წყაროებიდან შეავსოთ, როგორიცაა ხილი, ბოსტნეული ან საკვები დანამატები.
იოდით გამდიდრებული სუფრის მარილი გაცილებით სასარგებლოა, განსაკუთრებით იოდის დეფიციტის მქონე რეგიონებში, რადგან ზღვის მარილი იოდს ძალიან მცირე რაოდენობით შეიცავს.
მარილის გამოყენება კოსმეტოლოგიაში ან სხვა სამედიცინო პროცედურებში მის ფიზიკურ და არა ქიმიურ თვისებებს ეფუძნება. მაგალითად, მარილის დიდი კრისტალები, მათი წარმოშობის მიუხედავად, კანის მკვდარ უჯრედებს აშორებს და ანტისეპტიკური ეფექტი აქვს.
ინჰალაციების ეფექტს მარილის წვრილი ნაწილაკები განაპირობებს, რომლებიც ლორწოს მოცილებას ხელს უწყობენ, თუმცა იმავე შედეგის მიიღწევა შესაძლებელია სუფრის მარილის ხსნარით (ფიზიოლოგიური ხსნარით), რომელიც მედიცინაში ფართოდ გამოიყენება.
ზღვის მარილის საფრთხე
ბევრ ადამიანს მიაჩნია, რომ ზღვის მარილი უფრო ჯანსაღია, ვიდრე სუფრის მარილი, ამიტომ მისი დიდი რაოდენობით მოხმარებას იწყებს, რაც დიდი შეცდომაა.
მთავარი საფრთხე ის არის, რომ ზღვის მარილი, ისევე როგორც სუფრის მარილი, ნატრიუმს შეიცავს, რომლის სიჭარბე მაღალ არტერიულ წნევას იწვევს და გულ-სისხლძარღვთა დაავადებების რისკს ზრდის. თუ მენიუში ნატრიუმის მიღება დღიურ ნორმას (5 გრამი მარილი დღეში) აღემატება, სუფრის მარილის ზღვის მარილით ჩანაცვლება რისკის თვალსაზრისით, არაფერს ცვლის.
ზღვის მარილის მოხმარება ღირს თუ არა?
სუფრის მარილის ზღვის მარილით ჩანაცვლება ორგანიზმს არ აზიანებს, ამიტომ, თუ ზღვის მარილი მოგწონთ, მშვიდად მიირთვით, თუმცა გახსოვდეთ, რომ ზღვის მარილი და სუფრის მარილი ნატრიუმის ერთნაირ რაოდენობას შეიცავენ და ერთნაირი კვებითი ღირებულება აქვთ.
***
მარილის რა დოზაა სასიკვდილო ადამიანისთვის?
რატომ უნდა დაუმატოთ ყავას მარილი?
სიახლეები ამავე კატეგორიიდან
info@bp.ge
+995595334912