რატომ არ შეიძლება ეგვიპტიდან და მალდივის კუნძულებიდან ნიჟარების, ქვიშის, კენჭებისა და მარჯნების გატანა?

მნიშვნელოვანია გვესმოდეს, რომ ამ აკრძალვას საერთაშორისო საფუძველი აქვს. ეგვიპტე და მალდივები CITES-ის (გადაშენების პირას მყოფი სახეობებით საერთაშორისო ვაჭრობის შესახებ) კონვენციის წევრები არიან. ამ კონვენციით მიღებულია შეთანხმება, რომელიც გადაშენების საფრთხის წინაშე მყოფ სახეობებს იცავს და საზღვრებზე მათ გადაადგილებას მკაცრად აკონტროლებს. ტურისტების საყვარელი საზღვაო სუვენირები თითქმის ყოველთვის ამ კონვენციის სიაში ხვდება.

CITES-ის კონვენცია ფლორისა და ფაუნის იმ სახეობებით საერთაშორისო ვაჭრობას აწესრიგებს, რომლებსაც გადაშენება ემუქრებათ. ის ადგენს, რომ ასეთი სახეობების საზღვარგარეთ გატანა პირადი მიზნებისთვისაც კი დაუშვებელია.

მარჯნების, ნიჟარებისა და სხვა ბუნებრივი მასალების გატანა არა მარტო ეგვიპტიდან და მალდივის კუნძულებიდან, არამედ ტურისტული ქვეყნების უმეტესობიდან აკრძალულია. მსგავსი აკრძალვა მოქმედებს ტაილანდში, სეიშელის კუნძულებზე, ვიეტნამში, მალაიზიასა და კუბაზეც.

რა გემუქრებათ წესების დარღვევისთვის ქვეყნიდან გასვლისას

იმ ქვეყნებში, რომლებიც მხარს უჭერენ კონვენციას, მარჯნებისა და ნიჟარების გატანაზე მკაცრი აკრძალვები მოქმედებს. წესების დარღვევას ტურისტისთვის არასასიამოვნო შედეგები მოჰყვება და საქმე მხოლოდ გაფრთხილებით არ შემოიფარგლება.

ეგვიპტე

ეგვიპტიდან მარჯნების, ნიჟარებისა და სხვა ბუნებრივი ობიექტების გატანა პირდაპირ არის აკრძალული 1983 წლის №102 კანონის — „ბუნებრივი ნაკრძალების შესახებ“ — საფუძველზე.

აკრძალულია როგორც ცოცხალი, ისე მკვდარი მარჯნების, ნებისმიერი სახის ნიჟარის, ზღვის ვარსკვლავების, ზღვის ზღარბების, ზღვის ბინადრების ჩონჩხების, ასევე ქვიშისა და კენჭების გატანა. დარღვევა ითვალისწინებს ნივთების კონფისკაციას და ადმინისტრაციულ ჯარიმას 1000 აშშ დოლარამდე.

დიდი პარტიის ან დაცული სახეობების ექსპორტისთვის გათვალისწინებულია სისხლის სამართლის პასუხისმგებლობა, რაც შეიძლება მოიცავდეს პატიმრობას, დეპორტაციას და ქვეყანაში შესვლის შემდგომ აკრძალვას.

მალდივის კუნძულები

გარემოს დაცვის შესახებ №4/93 კანონის თანახმად, მალდივების ბუნებრივი რესურსები, მათ შორის ფლორა, ფაუნა და რიფები, ეროვნულ სიმდიდრედ ითვლება. ისინი უნდა იქნეს დაცული და შენარჩუნებული მომავალი თაობებისთვის, რის გამოც მოქმედებს აკრძალვა ნებისმიერი საზღვაო ორგანიზმის, მათ შორის ნიჟარებისა და მარჯნების გატანაზე.

ეგვიპტის მსგავსად, მალდივებზეც ანალოგიური აბსოლუტური აკრძალვა მოქმედებს ნებისმიერი მარჯნის, ნიჟარისა და ქვიშის გატანაზე. დარღვევა ისჯება კონფისკაციითა და სოლიდური ჯარიმებით — როგორც წესი, ეს თანხა დაახლოებით, 1000 აშშ დოლარს შეადგენს. ცალკეულ შემთხვევებში შესაძლოა სისხლის სამართლის პასუხისმგებლობაც დადგეს.

შეიძლება თუ არა ნიჟარებისა და მარჯნების ყიდვა?

ქვეყნის შიგნით ნიჟარების, მარჯნებისა და სხვა საზღვაო სუვენირების შეძენაზე ფორმალური აკრძალვა არ არსებობს. ტურისტული მაღაზიები და დახლები მათ ლეგალურად ყიდიან, როგორც ადგილობრივ საქონელს.

პრობლემა სწორედ ქვეყნიდან გატანის ეტაპზე იჩენს თავს:

ეგვიპტისა და მალდივების კანონმდებლობა კრძალავს ამ ნივთების საზღვარზე გადატანას, მიუხედავად იმისა, თუ როგორ და სად შეიძინეთ ისინი!

ანუ, სუვენირების მაღაზიაში ნიჟარის ყიდვა კანონდარღვევა არ არის, მაგრამ ქვეყნიდან გასვლისას მისი საბაჟოზე გატარება უკვე დარღვევაა.

გამყიდველები ტურისტებს ამის შესახებ იშვიათად აფრთხილებენ.

მნიშვნელოვანია! მაკონტროლებელ ორგანოებს აინტერესებთ არა კონკრეტული ნივთის წარმომავლობა, არამედ ქვეყნის ტერიტორიიდან მისი გატანის ფაქტი.

როგორ ავიცილოთ თავიდან ჯარიმები

არ იყიდოთ და არ აკრიფოთ პლაჟზე ნიჟარები, მარჯნები, ქვიშა ან სხვა ბუნებრივი სუვენირები. როგორც წესი, მათი ოფიციალურად გატანა შეუძლებელია, თუნდაც ადგილობრივ მაღაზიებში ყიდდნენ.

თუ ზღვიდან სუვენირის წამოღება მაინც გსურთ, შეიძინეთ ხელოვნური მასალისგან ან გადამუშავებული ნიჟარებისგან დამზადებული ნაკეთობა. თუმცა, ამ შემთხვევაშიც კი სასურველია გამყიდველთან დაზუსტება, ხომ არ შეგექმნებათ საბაჟოზე რაიმე პრობლემა.

თუ სუვენირი უკვე შეძენილი გაქვთ, აუცილებლად გადაამოწმეთ მისი გატანის შესაძლებლობა ტურისტულ აგენტთან ან საბაჟოს თანამშრომლებთან. ნუ შეეცდებით მარჯნებისა და ნიჟარების მალულად გატანას, რათა ჯარიმები და ქვეყანაში შესვლის აკრძალვა თავიდან აიცილოთ.

ამა თუ იმ ქვეყნიდან სუვენირების გატანამდე აუცილებლად გადაამოწმეთ ინფორმაცია საბაჟოს ან საელჩოს ვებგვერდზე.

***

რატომ აკრძალეს სინგაპურში საღეჭი რეზინა?

რატომ აკრძალეს ეგვიპტის პირამიდაზე ასვლა?

უცნაური აკრძალვა საფრანგეთში - რკინიგზის სადგურის ბაქანზე კოცნა არ შეიძლება!