აშშ-ში მაღაზიის კარზე უსაფრთხოებისთვის სახაზავს ამაგრებენ

fun time

19:00 ხუთ. 7 ივლისი, 2022 წელი

დაკოპირებულია

თუ ამერიკის შეერთებულ შტატებში ერთხელ მაინც ყოფილხართ, შენიშნავდით მაღაზიების კარზე დამაგრებულ ვერტიკალურ სახაზავს.

მაღაზიის კარზე სახაზავის ვერტიკალურად დამაგრება გასულ საუკუნეში დანაშაულთან ბრძოლის ერთ-ერთი ეფექტურ გზად ითვლებოდა.

ცნობილია, რომ მძარცველები მცირე შეწინაღმდეგებაზეც კი იარაღს იღებენ და ცეცხლს ხსნიან, ამიტომ ამერიკის ხელისუფლება თავის მოქალაქეებს სთხოვს, რომ წინააღმდეგობის გაწევის ნაცვლად, მძარცველებს კარგად დააკვირდნენ.

„მოექეცით მათ, როგორც საუკეთესო მომხმარებელს - მიეცით ყველაფერი, რასაც ითხოვენ და გააცილეთ“, - ასეთია მაღაზიებისთვის გაცემული რეკომენდაცია ძარცვის დროს. სახაზავი რა შუაშია? ის საშუალებას გაძლევთ თავდამსხმელის სიმაღლე ზუსტად დააფიქსიროთ.

საქმე ისაა, რომ ხშირად, სტრესის დროს ადამიანს თავდამსხმელი რეალურზე მაღალი ეჩვენება. აქედან გამომდინარე, პოლიცია დიდ დროს კარგავდა ორმეტრიანი დამნაშავეების ძებნაზე, როდესაც ნამდვილი ბანდიტი ტანდაბალი და გამხდარი მამაკაცი იყო.

ვერტიკალური სახაზავი ამ პრობლემას ეფექტურად წყვეტს და შეცდომის შანსებს ამცირებს. მაშინაც კი, თუ შეშინებულ თვითმხილველებს სახაზავზე შეხედვა დაავიწყდათ, კარისკენ მიმართული სათვალთვალო კამერები ყველაფერს დააფიქსირებენ.

ბუნებრივია, ვერტიკალური სახაზავების შესახებ მაღაზიის მეპატრონეების გარდა, ყაჩაღებმაც იციან, ამიტომ იმ მაღაზიებს, სადაც სახაზავია დამაგრებული, გაცილებით იშვიათად ესხმიან თავს.

პირველი სავაჭრო ქსელი, რომელმაც თავისი მაღაზიების კართან სახაზავის დამაგრება სავალდებულო გახადა, 7-Eleven იყო. ამის შემდეგ, 1976 წლიდან 1986 წლამდე, 24-საათიან მაღაზიებზე ღამით თავდასხმების რაოდენობა 50 პროცენტით შემცირდა.

შესაბამისად, ამერიკის სადღეღამისო მაღაზიების ასოციაცია ყველა სავაჭრო ობიექტს სახაზავების გამოყენებისკენ მოუწოდებს.