პლანეტების აღლუმი — 28 თებერვალს ცაზე შვიდი პლანეტა ერთდროულად გამოჩნდება

პლანეტარული აღლუმი ან გათანაბრება, ციური სანახაობაა, რომლის დროსაც რამდენიმე პლანეტა ერთ მწკრივად ჩანს ღამის ცაზე.

რა უნდა ველოდოთ პლანეტების აღლუმისგან?

მერკური, ვენერა, იუპიტერი და მარსი შეიძლება შეუიარაღებელი თვალითაც დაინახოთ.

სატურნის დანახვაც შესაძლებელია, თუმცა ის ჰორიზონტთან ახლოს იქნება, რაც მასზე დაკვირვებას გაართულებს. ურანისა და ნეპტუნის დასანახად კი ტელესკოპი დაგჭირდებათ.

პლანეტებზე დაკვირვებისთვის საუკეთესო დრო მზის ჩასვლის შემდეგ იქნება. ხილვადობა დამოკიდებულია თქვენს ადგილმდებარეობაზე და ამინდზე, ამიტომ სასურველია, შეარჩიოთ ადგილი, საიდანაც მოწმენდილი ცა მოჩანს.

შვიდივე პლანეტის ერთდროულად ხილვა იშვიათი მოვლენაა, რომელიც საინტერესოა როგორც პროფესიონალი ასტრონომებისთვის, ისე ვარსკვლავების მოყვარულთათვის.

ასე რომ, 28 თებერვალი მნიშვნელოვანი დღეა მათთვის, ვისაც ციური სამყარო იზიდავს. ეს უნიკალური შესაძლებლობა არ უნდა გამოტოვოთ!

რატომ ხდება შვიდივე პლანეტის აღლუმი ასე იშვიათად?

ასეთი ციური მოვლენა ძალიან იშვიათია და ეს რამდენიმე მიზეზით აიხსნება:

განსხვავებული ორბიტული პერიოდი – მზის სისტემის თითოეული პლანეტა მნათობის გარშემო განსხვავებული სიჩქარით და დროით მოძრაობს. მაგალითად, მერკურის ერთ სრულ ბრუნვას მხოლოდ 88 დღე სჭირდება, მაშინ როცა ნეპტუნი ამას 165 წელში ასრულებს. ორბიტულ პერიოდებში განსხვავების გამო პლანეტების ცის ერთ მხარეს სინქრონიზაცია ძალიან რთულია.

ეკლიპტიკის სიბრტყე – პლანეტები მზის გარშემო ერთ სიბრტყეში მოძრაობენ, მაგრამ სამგანზომილებიან სივრცეში ისინი ერთმანეთისგან მნიშვნელოვნად განსხვავებულ მანძილებზე შეიძლება იყვნენ. შედეგად, მიუხედავად იმისა, რომ ცაზე ისინი თითქოს ახლოს არიან, სინამდვილეში დიდი მანძილით არიან დაშორებულნი.

პირობების თანხვედრა – იმისთვის, რომ შვიდივე პლანეტა ერთდროულად გამოჩნდეს, ბევრი ფაქტორი უნდა ემთხვეოდეს. თუნდაც მათი მდებარეობა მზის, დედამიწისა და ერთმანეთის მიმართ.ზოგი პლანეტა შეიძლება მზესთან სიახლოვის გამო არ ჩანდეს, რაც ხშირად ხდება.

სრულყოფილი განლაგება – ცის ერთ მონაკვეთში შვიდივე პლანეტის თავმოყრა ძალიან იშვიათია. ბოლოს ეს მოვლენა 15 წლის წინ დაფიქსირდა და შემდეგი მხოლოდ 2040 წელს არის მოსალოდნელი.

ამ მიზეზების გამო, შვიდივე პლანეტის ერთდროული ხილვა გამორჩეულად იშვიათი და უნიკალური მოვლენაა.

თუ გაგიმართლათ და ცა მოწმენდილი აღმოჩნდა, აუცილებლად გამოიყენეთ ეს შესაძლებლობა!

ესეც დაგაინტერესებთ:

რამდენია ადამიანის ასაკი და წონა სხვა პლანეტებზე?

რამდენი წელი შეიძლება იცოცხლოს ადამიანმა მარსზე?

მარსზე თავდაპირველად ქალები გაფრინდებიან?

წყარო: www.independent.co.uk