ვინ არის კაცი, ვინც რომის პაპს აცმევს - ვატიკანის მოდის „რუხი კარდინალი“ ფილიპო სორჩინელი

ვინ არის ფილიპო სორჩინელი

მაღალი, წვერიანი მამაკაცი, უჩვეულო სვირინგებით და ძალიან ჭკვიანური მზერით დანახვისთანავე ნებისმიერი ადამიანის ყურადღებას მიიპყრობს.

ფილიპო სორჩინელი ცნობილი იტალიელი მხატვარი, დიზაინერი, მუსიკოსი, პარფიუმერი და რომის პაპის პირადი მკერავია.

სორჩინელის Oversize-ის სტილის ტანსაცმელი და შიშველი ტორსით ფოტოების გადაღება მოსწონს და დიახ, ძნელი წარმოსადგენია, რომ ასეთი ადამიანი კათოლიკური ეკლესიის მეთაურს აცმევს.

ინტერესი ეკლესიის მიმართ

ფილიპო მონდოლფოში 1975 წელს დაიბადა. ბიჭუნას რელიგიის მიმართ ინტერესი ადრეულ ასაკში გაუჩნდა და ეს გასაკვირი არ არის, რადგან დედამისი ღრმად მორწმუნე კათოლიკეა. ქალი მონდოლფოს ერთ-ერთ უდიდეს ეკლესიაში დამლაგებლად მუშაობდა და შვილი ხშირად სამსახურში დაჰყავდა.

სანამ დედა იატაკს წმენდდა, პატარა ფილიპო ტაძრის მშვენიერებით ტკბებოდა. თითოეულ ფრესკას და ხატს აკვირდებოდა და საკუთარ წარმოსახვაში მათ გაცოცხლებას ცდილობდა.

სორჩინელი ამბობს, რომ სამი საათის განმავლობაში, რომელსაც დედა ტაძრის დალაგებას ანდომებდა, მის წინაშე ეკლესიური ხელოვნების მთელი მშვენება იშლებოდა. დიზაინერი იხსენებს, როგორ იპოვა ტაძრის ძველ კარადაში გასაღებების ასხმა, რომელიც ძველისძველი, მტვრიანი კარის გაღებაში დაეხმარა. კარის გაღების შემდეგ ბიჭუნა ხის კიბეზე ავიდა და დიდი ლითონის ურჩხული დაინახა, რომელიც კვარცხლბეკზე იდგა. ეს ორგანი იყო. ბიჭმა მასზე დაკვრა სცადა, მაგრამ არ გამოუვიდა. მოგვიანებით ინსტრუმენტი თავისით ჩართო და ამღერდა..

პატარა ბავშვის ცნობისმოყვარეობა საბოლოოდ, ცოდნის მიღების დიდ სურვილში გადაიზარდა.

ხელოვნების სკოლის შემდეგ ფილიპომ პესაროს კონსერვატორია დაამთავრა. შემდეგ კი რომის სასულიერო მუსიკის პონტიფიკურ ინსტიტუტში ორღანის შესასწავლად გაემგზავრა.

როგორ იქცა მუსიკოსი დიზაინერად?

2021 წელს ფილიპომ კიდევ ერთი მიმართულებით დაიწყო განვითარება. მან კომპანია LAVS (Laboratorio Atelier Vesti Sacre) დააარსა, რაც ლათინურიდან ითარგმნება როგორც "ქება".

სორჩინელის ატელიემ კათოლიკურ წრეებში პოპულარობა სწრაფად მოიპოვა და ახლა ფილიპო უმაღლესი სასულიერო იერარქების სამოსს კერავს.

***

სად ყიდულობენ ტანსაცმელს პრეზიდენტები?

როგორ შეიწირა „მინის“ აკრძალვამ სამხრეთ კორეის ორი პრეზიდენტი

რატომ მიიჩნევდნენ ევროპაში ზოლიან სამოსს სატანის ნიშნად?