კვლევა: რას აზიანებს ყოველდღე ბანაობა?

ამერიკელების, დაახლოებით, 2/3 შხაპს ყოველდღე იღებს. მათი თქმით, ეს გამოფხიზლებაში ეხმარებათ, სისუფთავეს განცდა კი გუნებას უკეთესობისკენ უცვლის.

მეცნიერები კი შიშობენ, რომ „შხაპის ყოველდღიურად მიღება შეიძლება, ჯანმრთელობისთვის მავნეც კი იყოს“. ხშირი ბანაობა კანს ჯანმრთელობისთვის საჭირო ბაქტერიებსა და დამცავ ცხიმს აცლის.

ეს განსაკუთრებით ხანდაზმულ ადამიანებს ეხებათ, რომელთა კანი ნელ-ნელა თხელდება, ნაკლებად ტენიანი და მეტად მგრძნობიარეა. მშრალი, დანაოჭებული კანი ბაქტერიებს სიღრმეებში შეღწევის საშუალებას აძლევს, რაც ინფექციებისა და ალერგიული რეაქციების მიზეზი ხდება.

ინფექციური დაავადებების ექსპერტი და კოლუმბიის უნივერსიტეტის საექთნო სკოლის ასოცირებული დეკანი, ელენ ლარსონი ბანაობასთან დაკავშრებულ ჩვენს წარმოდგენას თავდაყირა აყენებს:

„ხალხი ფიქრობს, რომ შხაპის მიღებით სუფთავდებიან, მაგრამ ბაქტერიოლოგიურად სხვა სურათია. ბანაობა, ძირითადად, ესთეტიკურ მიზანს ემსახურება“.

შხაპს შეუძლია, კანის ჰიდროლიპიდური გარსი დაარღვიოს და, შესაბამისად, ბარიერის ფუნქცია მოუშალოს, რის შემდეგაც კანი ბაქტერიებისა თუ ვირუსების შეჭრისგან დაუცველი გახდება.

ექსპერტები გვირჩევენ, ვიბანაოთ არა ყოველდღე, არამედ კვირაში 1-2-ჯერ. ეს რეკომენდაცია განსაკუთრებით საგულისხმო ზამთრის პერიოდშია, როცა დროის დიდ ნაწილს გამათბობლით გამომშრალ ოთახში ვატარებთ. მშრალი ჰაერის ზემოქმედებას ხშირი შხაპი კიდევ უფრო ამძაფრებს.

ფოტო Andrea Piacquadio

წყარო: www.considerable.com