ყავა თუ კაკაო — რომელია უკეთესი დილის ენერგიისა და მხნეობისთვის?

ყავა — სწრაფი ენერგია და მხნეობა

ყავა დილის ყველაზე გავრცელებული არჩევანია. მისი პოპულარობის საიდუმლო კოფეინის მაღალ შემცველობაშია, რომელიც ორგანიზმზე ასე მოქმედებს:

მხნეობა და კონცენტრაცია

კოფეინი ააქტიურებს ცენტრალურ ნერვულ სისტემას, რაც ზრდის ყურადღების კონცენტრაციასა და შრომისუნარიანობას.

ამავე დროს, ის აფერხებს ადენოზინის (დაღლილობის გამომწვევი ნივთიერების) რეცეპტორებს და ხელს უწყობს დოფამინისა და ნორადრენალინის გამოყოფას (ნეირომედიატორები, რომლებიც პასუხს აგებენ გუნება-განწყობის გაუმჯობესებასა და გონებრივ აქტივობაზე).

ენერგია და ნივთიერებათა ცვლის დაჩქარება

ყავა აჩქარებს მეტაბოლიზმს, რაც კალორიების სწრაფ წვას ხელს უწყობს. ეს განსაკუთრებით სასარგებლოა მათთვის, ვისაც სურს წონა დაიკლოს ან აქტიურობა მთელი დღის განმავლობაში შეინარჩუნოს.

კოფეინს ასევე ფიზიკური გამძლეობის გაზრდა შეუძლია. ის ააქტიურებს ენერგიის გამომუშავებას და აუმჯობესებს კუნთების მუშაობას, რაც ყავას დილის ვარჯიშის წინ იდეალურ არჩევანად აქცევს.

ამდენი სარგებლის მიუხედავად, ყავამ (განსაკუთრებით დიდი რაოდენობით მოხმარებისას) შეიძლება ისეთი გვერდითი ეფექტები გამოიწვიოს, როგორებიცაა შფოთვა, უძილობა, თავის ტკივილი ან აჩქარებული გულისცემა.

კაკაო — მსუბუქი გამოფხიზლება და ხანგრძლივი ენერგია

ყავისგან განსხვავებით, კაკაო კოფეინის დიდ რაოდენობას არ შეიცავს, თუმცა მას სხვა სასარგებლო თვისებები გააჩნია, რომლებიც დილის მხნეობას ხელს უწყობს.

კაკაო შეიცავს თეობრომინს — ნივთიერებას, რომელიც კოფეინის მსგავსად მოქმედებს, თუმცა ბევრად რბილი და ხანგრძლივი ეფექტი აქვს. თეობრომინი ენერგიის მომატებასა და მხნეობის შენარჩუნებაში გვეხმარება.

კაკაო ანტიოქსიდანტების, კერძოდ ფლავონოიდების მდიდარი წყაროა, რომლებიც გულისა და სისხლძარღვების ჯანმრთელობის შენარჩუნებაში გვეხმარებიან. ეს ნივთიერებები სისხლის მიმოქცევას აუმჯობესებენ და წნევას და გულ-სისხლძარღვთა დაავადებების რისკს ამცირებენ. შესაბამისად, კაკაო არა მხოლოდ წუთიერ მხნეობას გვანიჭებს, არამედ ჩვენს ხანგრძლივ ჯანმრთელობაზეც ზრუნავს.

კაკაო ებრძვის დაბერებას (ანტიოქსიდანტები იცავენ უჯრედებს დაზიანებისგან), არეგულირებს წონას, აჩქარებს ნივთიერებათა ცვლას და თრგუნავს შიმშილს. ასევე ამცირებს დიაბეტის რისკს და ზრდის ინსულინის მიმართ მგრძნობელობას.

კაკაო ორგანიზმს მაგნიუმით ამარაგებს, რაც ხელს უწყობს მოდუნებასა და კარგ განწყობას.

რომელი ავირჩიოთ?

ყავის დადებითი თვისებები:

• გამოფხიზლების სწრაფი ეფექტი.
• ყურადღების კონცენტრაციისა და შრომისუნარიანობის ამაღლება.
• მეტაბოლიზმის გააქტიურება და ფიზიკური აქტივობის გაუმჯობესება.

უარყოფითი თვისებები:

• ნერვული სისტემის გადატვირთვა: იწვევს შფოთვას, ნერვოზულობასა და შინაგანკანკალს
• ძილის დარღვევა: კოფეინი ბლოკავს ძილის ჰორმონებს, რაც იწვევს უძილობას
• არტერიული წნევის მომატება: დროებით ზრდის წნევას და აჩქარებს გულისცემას
• კუჭის გაღიზიანება: ააქტიურებს მჟავის გამოყოფას, რაც იწვევს გულძმარვას
• დამოკიდებულება: ყავის მკვეთრი შეწყვეტა იწვევს თავს ტკივილსა და დაღლილობას
• მინერალების გამოდევნა: ხელს უშლის კალციუმის, მაგნიუმისა და რკინის შეწოვას
• ხშირი შარდვა: ახასიათებს დიურეზული ეფექტი, რამაც შეიძლება გამოიწვიოს დეჰიდრატაცია.

კაკაოს დადებითი თვისებები:

• რბილი, თანაბარი და ხანგრძლივი მხნეობა.
• შეიცავს გულისა და სისხლძარღვებისთვის სასარგებლო ანტიოქსიდანტებს.
• არ აღიზიანებს კუჭს.
• მდიდარია ვიტამინებითა და მინერალებით (მაგნიუმი, კალიუმი, რკინა).

უარყოფითი თვისებები:

ჭარბი რაოდენობით მიღებისას

• იწვევს ალერგიას
• ძილის დარღვევას კოფეინის გამო
• ართულებს კალციუმის ათვისებას, რაც ასუსტებს ძვლებს
• ტვირთავს ნივთიერებათა ცვლას მძიმე მეტალების შემცველობის გამო
• მაღალკალორიულია და შაქართან ერთად ზრდის წონას.

☕

ასე რომ, თუ დილას ძლიერი იმპულსი და სწრაფი გამოფხიზლება გჭირდებათ, ყავა საუკეთესო არჩევანია. ის უფრო სწრაფად მოქმედებს და ძლიერი სტიმულაციის ეფექტი აქვს.

თუ უპირატესობას უფრო რბილ, ეტაპობრივ და ხანგრძლივ გამოფხიზლებას ანიჭებთ, კაკაო შესანიშნავი ალტერნატივაა. ის ორგანიზმს მშვიდად გაღვიძებაში ეხმარება, ენერგიის სტაბილურ დონეს ინარჩუნებს და ორგანიზმის სტრესს არ იწვევს.

საბოლოო არჩევანი თქვენს საჭიროებებსა და ორგანიზმის თავისებურებებზეა დამოკიდებული.

***

მწვანე ყავა გასახდომად: სასწაულმოქმედი პროდუქტი თუ მარკეტინგული მითი?

რატომ არის სასარგებლო ყავისთვის წყლის მიყოლება?

უკოფეინო ყავა - მოამზადეთ ფინიკის კურკებისგან