მჟავე კიტრი ნაძვის ხეზე: ახალი წლის დეკორის უჩვეულო ისტორია

პირველი ვერსია: გერმანული კვალი

ნაძვის ხეზე კიტრის ჩამოკიდების ტრადიცია აშშ-ში ძალიან პოპულარულია და ამერიკელებს მიაჩნიათ, ის მათთან გერმანიიდან შევიდა. ამიტომაც მჟავე კიტრი ამერიკელებისთვის გერმანიასთან ასოცირდება. მაგრამ თავად გერმანელებმა „თავიანთი უძველესი ტრადიციის შესახებ“ არაფერი იციან.

ვერსია მეორე: სამხედრო დროის კანონებით

აშშ-ში სამოქალაქო ომის დროს ბევრი ლეგენდა გაჩნდა, რომელთა შორის ტყუილ-მართლის გარჩევა ძნელია. ერთ-ერთი ამგვარი ისტორია ჯარისკაც ჯონ კ. ლოუერს (John C. Lower) ეხება, რომელიც ომის დროს კონფედერატებმა იგდეს ტყვედ. ტყვეს ცუდად ექცეოდნენ, აშიმშილებდნენ. შობის ღამეს ლოუერმა ზედამხედველს საჭმელი სთხოვა. ზედამხედველმა მოწყალება გაიღო და ტყვეს მჟავე კიტრი უწილადა. სახლში დაბრუნებულმა ყოფილმა ტყვემ ოჯახის წევრებს მოუთხრო თავისი გადარჩენის ამბავი. მას შემდეგ ლოუერების ოჯახში ტრადიცია დამკვიდრდა: საშობაო ნაძვის ხეზე მჟავე კიტრის ჩამოკიდება.

ვერსია მესამე: წმინდა ნიკოლოზის სასწაული

მესამე ლეგენდა წმინდა ნიკოლოზის ლოცვის შედეგად მომხდარ სასწაულს უკავშირდება.
როცა წმინდანი ჯერ კიდევ ეპისკოპოსი იყო, მან შეიტყო ერთი ბოროტი ვაჭრის შესახებ, რომელმაც სამი ბიჭი მოიტაცა და მჟავე კიტრის კასრში დაამწყვდია. წმინდა ნიკოლოზმა ღმერთს ბავშვების გადარჩენა სთხოვა და ლოცვა დაიწყო. მისი რწმენა იმდენად ძლიერი აღმოჩნდა, რომ ბიჭები უვნებლები დაბრუნდნენ სახლში.

ტრადიციის მიხედვით, ნაძვის ხეზე ერთ კიტრს კიდებენ, თანაც ტოტებში კარგად მალავენ. ხალხს სჯერა, რომ ვინც კიტრს პირველი აღმოაჩენს, მას ბედის წყალობა მთელი წელი არ მოაკლდება. თანაც მას ტკბილეულის დამატებითი ულუფა და საჩუქარი ერგება.

თქვენ გაქვთ მჟავე კიტრის ფორმის სათამაშო ნაძვის ხეზე?

🎄:

საახალწლო ნაძვის ხის განათება - ამერიკელი ქართველის გამოგონება

საახალწლო კერძები სხვადასხვა ქვეყნებში

როგორ ემზადებოდნენ ახალი წლის შესახვედრად საბჭოთა კავშირში?