ვაშლის შტრუდელი ლავაშით - მარტივი რეცეპტი მათთვის, ვისაც ვაშლის ნამცხვარი გიყვართ

ვაშლის ნამცხვარი ან, ზოგადად, ხილის ნამცხვარი ვისაც გიყვართ, ინტერნეტში ასობით სხვადასხვა რეცეპტი შეგიძლიათ მოიძიოთ, თუმცა, გარწმუნებთ - ამ შტრუდელზე იაფს და მარტივს ძნელად მიაგნებთ.

ლავაშიანი ვაშის შტრუდელის მომზადებაში, მაქსიმუმ, 40-50 წუთი დაგეხარჯებათ და აქედან ყველაზე მეტ დროს ვაშლის გათლა და დაჭრა წაიღებს. ამ რაოდენობის პროდუქტით 4 პორცია გამოგივათ.

საჭირო პროდუქტი:

• ლავაში - 1 ფირფიტა
• ვაშლი - 3-4 ცალი (მაგალითად, ზაფხულის ვაშლი ან მწვანე ვაშლი მოტკბო ჯიშის)
• ქიშმიში - 40 გრ. (1 სუფრის კოვზი ქიშმიში=25 გრ.)
• შაქარი - 100 გრ. (1 სუფრის კოვზი შაქარი თავმოდგმული=30 გრ.)
• დარიჩინი - 1 ჩაის კოვზი
• კარაქი - 60 გრ
• კვერცხი - 1ცალი
• საფანელი - 3 სუფრის კოვზი
• შაქრის პუდრი - 1 სუფრის კოვზი (მოსართავად).

მომზადების წესი:

გაფცქვნილი ვაშლი დაჭერით პატარა კუბიკებად (თუ თხელი კანი აქვს, შეგიძლიათ, გაუთლელად დაჭრათ);

გაცხელებულ ტაფაზე დააგდეთ 30 გრ. კარაქი. კარაქი ოდნავ რომ გალღვება, დააყარეთ დაჭრილი ვაშლი და დაიწყეთ მოშუშვა. 2-3 წუთში დაამატეთ შაქარი და დარიჩინი. შუშეთ, სანამ ვაშლი ოქროსფრად შეფერადდება;

როცა ვაშლი მოითუშება, მოშუშული ვაშლი გადმოყარეთ ჯამში, დააყარეთ ქიშმიში და კარგად აურიეთ;

დარჩენილი 30 გრ. კარაქი გაადნეთ ტაფაზე (სულ ცოტა კარაქი მოიტოვეთ საცხობ ფორმაზე წასასმელად) და შემდეგ სწრაფად წაუსვით (ფუნჯით უმჯობესია) ლავაშზე, რომელიც წინასწარ გექნებათ გაშლილი; ლავაშზე გადასმულ კარაქზე საფანელი მოაბნიეთ;

მოშუშული ვაშლი გადმოიღეთ ლავშის შუაგულში და დანით გადაანაწილეთ თანაბრად - ისე, რომ ლავაშის ნაპირებთან ადგილი დატოვოთ. ლავაშზე დადებულ ვაშლის შიგთავსს ზემოდან ასევე საფანელი მოაბნიეთ;

ლავაშის გვერდითა ნაპირები გადმოკეცეთ და შემდეგ თქვენგან წინ რულეტად ფრთხილად გადახვიეთ; აერღუმელის ლანგარზე (ჟარონაზე) დააფინეთ საცხობი ქაღალდი, თხლად გადაუსვით კარაქი და ზედ დადეთ რულეტი. რულეტს ფუნჯით წაუსვით ათქვეფილი კვერცხი, რამდენიმე ადგილად ჩაჩხვლიტეთ და შედგით გახურებულ აირღუმელში;

აცხვეთ 25-30 წუთი 180 გრადუს ტემპერატურაზე. ჰაერღუმელიდან გამოღებისთანავე, ცხელსვე მოაყარეთ შაქრის პუდრი.

შენიშვნა:

დარიჩინი თუ არ გიყვართ, შეგიძლიათ, არ დაამატოთ;

ვაშლი შეგიძლიათ, მსხლით ჩაანაცვლოთ და იმავენაირად მოამზადოთ;

100 გრ. შაქარი შეგიძლიათ, 1 სუფრის კოვზი დაფლით ჩაანაცვლოთ;

თუკი ცხობისას რულეტიდან კარამელი (შაქრის წვენი) გამოვიდა, ღუმელიდან გამოღებისთანავე, ცხელი გადადეთ თეფშზე - წინააღმდეგ შემთხვევაში, საცხობ ქაღალდს მიეწებება;

უმჯობესია, დაჭრათ ცხელ-ცხელი თქვენთვის მისაღებ პორციებად.

გემრიელად მიირთვით!